Admin
Admin
عدد المساهمات : 739
تاريخ التسجيل : 27/01/2008
العمر : 124
 |  موضوع: قَصِيدَةُ الدربلة / اَلْبَاتُولْ للشيخ الجيلالي امتيرد  السبت 12 فبراير 2022 - 23:56 | |
| قَصِيدَةُ الدربلة / اَلْبَاتُولْ
للشيخ الجيلالي امتيرد مبيت خماسي
القسم الأول
آمَنْهُ قَلْبُ وُخَاطَرُمَجْرُوحْ
بَصْوَارَمْ اَلْبْهَا مَبْطـُوحْ
يَكْفَا تْنُوحْ
لَوْعَشْتِي فَالزّْمَانْ مُدَّتْ نُوحْ
مَثْلْ اَلْمْنَامْ
لاَزَمْ حَالْ اَلْمْسَاعْفَا وَالطُّوعْ
وَخْضَعْ كَلْوْصِيفْ خْضُوعْ
وَرْخِ لَقْلُوعْ
النـَّاسْ دْوَاحْ وَ الطـّْبَاعْ فـْرُوعْ
عْلَى الـْقـْسَامْ
وَادْمُوعْ الشـُوقْ مَا تـْبَرَّدْ نـَارْ
تَعْدِيبْ لـَلـَعْضَا وَ اصْيَارْ
صَحّْ لـَخْبَارْ
وُ اعْسُولْ الحُبّْ لـَلـْعْشِيقْ مْرَارْ
فـَعْلْ شـْيَامْ
قَبْلـَكْ لِيَّامْ وَسّْنِينْ اَشْحَالْ
نَرْجَا رْوَامَكْ الجَّفَّالْ
دَاتْ اَلْجْمَالْ
اَتُّوكْ كْمَا يْتُوكْ ضَيّْ اَهْلاَلْ
شَهْرْ الصّْيَامْ
نَدْوِِي خُوفِي اَنْعِيبْ كَانْ دْوِيتْ
لاَمَنْ اَنْحَدَّتُ بَحْدِيتْ
وَلاَرْضِيتْ
نَصْبَرْ كَدِّيتْ اَوْمَاكَدِّيتْ
طُولْ الدّْوَامْ
كُتْمَانْ السَّرّْ فَلْحْشَــــــــا خَبِّيهْ
حَجْبُ وُلاَتْحَدَّتْ بِهْ
خَفْيَا اَخْفِيهْ
وَاصْبَرْ لَلصَّدّْ وَالجّْفَا وَالتِّيهْ
صَبْرْ اَلْهْيَامْ
نـَشْبَهْ فـَالحـُبّْ جَابَرْ وُغِيلاَنْ
وَكْدَاكْ قَيْسْ وَالوَسْنَانْ
فَاتُو اَزْمَانْ
وَنَيَا فِي دَ الزّْمَانْ مَالِي تَانْ
قَدّْ اَلْهْيَامْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ
القسم الثاني
يَاكْ اَلطَّاعَا وَاجْبَا عْلَى اَلْمَغْرُومْ
وَالتِّيهْ لَلْبْهَا مَعْلُومْ
مَافِيهْ لُومْ
يَفْعَلْ مَارَادْ وَالصّْبَرْ مَلْزُومْ
لَهْلْ اَلْغْرَامْ
وَاشْ الدَّامِي اِلا َشْرَدْ يَنْعَابْ
هَدِيكْ سِيرَتْ الرّْبْرَابْ
فُوقْ السّْرَابْ
يَضِّيَّلْ مَنْ اَبْعِيدْ عَلْ لَهْضَابْ
رَامِيهْ رَامْ
مَايَرْفَقْ زِينْ مَايْحَنّْ اطْبِيبْ
لَغْرَامْ مَايْلِهْ احْبِيبْ
وَلاَ اَقْرِيبْ
يَحْكـُمْ فـَالعَاشْقِينْ حُكـْمُ اصْعِيبْ
مَالـُو ادْمَامْ
كِيفْ اصْبَاحِي الـْيُومْ كِيفْ اغـْدا
لامَنْ يْقُولِي عَمْدَا
قـَلْ الجْدَا
لا صَاحَبْ لاسْنِيدْ لا سَنـْدَا
فِي دَا الرّْسَامْ
هَدَا حَالْ اَلْغرَامْ فِي مَبْدَاهْ
لاَخَاطَرْ يُوجَدْ مُولاَهْ
فِي مَنْ اَهْوَاهْ
مَكـْمُوخْ عْلَ مْحَايْنُ وَلْضَاهْ
هُولْ اُسْقَامْ
وِيلَى صَحّْ لْوْصَالْ بَعْدْ اَغْيَارْ
يَدْهَبْ بَلْهْنَا وَسْرَارْ
يُومْ اَلْمْزَارْ
مَامَتْلُ يُومْ بَالزّْهُو يُدْكَارْ
قَصْدْ اَلْمْرَامْ
نَهْوَا بَكْرَايَحْ اَلْهْوَى نَهْوَا
فـَرْحَا وُعَزّْ مَنْ نَهْوَا
طَبّْ اُدْوَا
بِهَا فَكْرِي اَلْهَلّْ اَلْحَالْ اَدْوَا
لـَهْلْ الغـْرَامْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ
القسم الثالث
حُسْنْ اَهْلاَلِي وُزِينْ سَرّْ اَبْدِيعْ
يَحْيِي اَدْهَانْ كُلّْ اَوْلِيعْ
بَاهِي اَسْطِيعْ
يَفْجِي قَنْطْ اَلْهْمُومْ وَالتَّرْوِيعْ
صَافِي اَقْوَامْ
وَالْقَدّْ اَحْكِيتْ كـَالْهْفِيفْ اَخْلِيلْ
غُرَّا مْعَ اَلْجْبِينْ اَسْهِيلْ
فأَضْلاَمْ لِيلْ
وَالتِّيتْ اَمْعَطَّرْ النْسَامْ اَكْحِيلْ
فَاتْ اَلْحْزَامْ
حَجْبِينْ اَقْوَاسْ وَالْعْيُونْ دْعَاجْ
وَشْفَارْ بَنْدَقِي وَالدَّاجْ
مَاضِي وُسَاجْ
وَخْدُودْ نْضَافْ وَرْدْ لَلتَّخْرَاجْ
فَتّْحْ اَلْكْمَامْ
غَنْجُورْ اَخْلاَلْ وَاَلْمْرِيشََفْ بَاغْ
بَالْعَزّْ رَايَدْ التَّصْبَاغْ
رَضْبْ اَلْدَاغْ
وَالثَّغْرْ عَدْبِي فـَايْقْ التَّبْزَاغْ
شُفْ النّْيَامْ
جِيدْ اُعَتْنُونْ وَرْكَبَا وَدْعَاضْ
هَلـُّو عَلْ اَلْمْزُونْ اَعْرَاضْ
زَهْوْ اَلْغْرَاضْ
آمْلاَ لَقْمِيصْ عْلَى الصّْدَرْ يَلْحَاضْ
فِيهْ لْوْشَامْ
وَاصْدَرْ كـَمْخَا مْقَصّْرَا وَعْكُونْ
سُرَّا اَنْهَايَتْ اَلْمَضْنُونْ
رَدْفْ السّْكُونْ
يَدَفَعْ للْوَرْكْ يَنْتْقَلْ مَشْحُونْ
سُوقْ الزّْحَامْ
وَفْخَادْ اَحْكِيتْ كَشْوَا بَلْ زُوجْ
غِيَّابْ عَنْ اَكْسِيرْاَلْمُوجْ
فُوقْ الّْجُوجْ
وَالسَّاقْ اِتِيَّهْ اَلْعْقَلْ مَدْغُوجْ
فُوقْ اَلْقْدَامْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ
القسم الرابع
فَحْلِي وَحْلُولْ مَنْ اَدْبَاجْ اَحْرِيرْ
وَكْمَامْهَا عْلِيهْ اَتْشِيرْ
نَعْتْ اَلْحْدِيرْ
فَاقَتْ عَبْلاَ وُجَازْيَا وَالْغِيرْ
بْنـَاتْ سَامْ
حَسَنْ اَرْفِيعْ مَايْلِيهْ اَشْقِيقْ
مَاخَطْبُ اَلْسَانْ اَعْشِيقْ
وَلاَيْطِيقْ
فَرْجَتْ لَهْنَا اَتْلَدّْ لَلتَّعْنِيقْ
يُومْ اَلْمْكَامْ
مَنْ دَ التَّوْصَافْ مَاوْجَدْتّْ اَسْرَاحْ
وَالْبِينْ زَادْنِي تَجْيَاحْ
وَالسَّرّْ بَاحْ
هَزَّتْ غُصْنِي مَنْ اهْبُوبْ اَرْيَاحْ
اَلْقَلْبْ زَامْ
مَدْرَابُوصَالْ بُودْلاَلْ اَنْفُوزْ
نَضْحَى ابْحُبّْهَا مَعْزُوزْ
تَبْرْ اَلْكْنُوزْ
وَنْقَبَّلْهَا عْلَى الرّْضَى وَنْحُوزْ
زَهْرْ النّْسَامْ
وَنْغـَنْمُو سَاعْتْ الرْضَا فَبْسَاطْ
بَنْهَايَتْ لَعْشَقْ وَرْبَاطْ
مَنْ شِي اَرْهَاطْ
كِيسَانْ اَتْدُورْ وَاَلْوْتَرْ لَغَّاطْ
سُوطْ وُ انـْغَامْ
فُوقْ اَسْهَاوي اَفْرَاشْ
فـُوقْ اَفْرَاشْ
قـَرْفِي وُسُنْدُسِي وَقْمَاشْ
لَهْلْ اَلْفْيَاشْ
سَلْوَانْ اَلاَّ يْخَلّْصُوهْ اَقـْرَاشْ
عَرْبْ اُعْجَامْ
وَحْنَا بَحْدِيتْنَا عْلَى التَّوْنِيسْ
اَعْرُوسْ بَارْزَا وَعْرِيسْ
لَيْلَى وُقِيسْ
نَحْضَرْ وَنْغِيبْ نْعْدَلْ وَنْمِيسْ
عَرْضْ اَجْرَامْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ
القسم الخامس
اَشَنْهِيَ قِيمَتْ اَلْبْهَا اَلْمَنْضُودْ
فِي سَاعَتْ يَعْطَفْ وِيْجُودْ
سَعْدْ السّْعُودْ
يَنْشَرْ مَنْ لِيعْتْ لـَفْرَاقْ َبْنُودْ
لِيلَى اَبْعَامْ
مَحْلاَ صُوتْ النّْسَا الى يَدْوِيوْ
فَالْقَلْبْ وَالْعْضَا يَسْرِيوْ
وِيلَى يْجِيوْ
رُوضْ اَلْمُهْجَا اشـْجَارْهَا يَحْيِيوْ
مَحْيَ الدّْمَامْ
بَشَّارْ اَلْفَرْحْ مَنْ اَلْقَبْلاَ صَاحْ
بُشْرَا يْقُولْ عَلْ لَفْرَاحْ
صَبْحْ الصّْبَاحْ
لاَحَتْ شَمْسْ اَلْفْلاَكْ عَلْ لَبْطَاحْ
سَعْدِ اَسْكَامْ
وَقْفْ اَلْمِيمُونْ بَالرّْضَا وَفَاتْ
وَرْضِيتْ بَالرّْضَا وَرْضَاتْ
تَاجْ الْبْنَاتْ
وَغـْنَمْنـَا بَالسّْرُورْ شَايَنْ فَاتْ
مُدَّ اِيَّامْ
وَشْفـِينَا غَرْضْنَا عْلَى التَّحْقِيقْ
نَادَ اَلْبِينْ لَلتَّفْرِيقْ
فَرْغْ اَلْمْضِيقْ
هَلَّتْ بَقْلاَيَدْ النّْجَالْ اًعْقيقْ
قَاوِي اَسْجَامْ
بَلْسَانْ الحَالْ قُلْتْ لَلْمِيلاَفْ
لَفْضَالْ بَلْفْضَلْ تُعْرَافْ
تَحْفْ التّْحَافْ
لحْبَابْ اَحْبَابْ وَلْوْلاَفْ اَوْلاَفْ
وَالْخِيرْ تَامّْ
وَدَّعْتْ اَلْبَاهْيَا بْقَلْبْ اَسْلِيمْ
وَعْلَى اَنْهَايَتْ التَّقْوِيمْ
وَنَااَنْزِيمْ
ضَرْغَمْ فـْرِيدْ فَالرّْسَامْ مْكِيمْ
لِيتْ الزّْعَامْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ
القسم السادس
غَنِّي وَزْهَى وُصُلْ يَاحَفَّاظْ
عَجْرُدّْنَا بْسَرُّ فَاضْ
تَبْرْ اَلّْفَاضْ
دَكَّرْوَحْيِي قْلُوبْ هَلْ لَوْعَاظْ
بَعْدْ السّْلامْ
غَنِّيتْ اَلْمَنْ اَصْغَى بْطَبْعْ اَغْرِيزْ
بَرْجَاحَتْ اَلْعْقَلْ وَالْمِيزْ
مَنْ هَلّْ اَلْمِيزْ
سَابَكْ لَحْرُوبْ مَاحْتَاجْ اَهْمِيزْ
يُومْ الّْطَامْ
خَبْرِي فِي بَهْجَتْ لَمْتُونْ اَشْهِيرْ
مَعْنَا وُشْرَحْ لَلتَّفْسِيرْ
مَالُ اَنْضِيرْ
سَرّْ اَلْمَوْلَى فْمَنْ اَوْضَعْ تَنْوِيرْ
لـَهْلْ النـّْظـَامْ
قَالْ الجِّيلاَلِي اَلْمَنْ اَفـْهَمْ وَ اصْغَا
هَزَّامْ مَنْ كـْرَهْ وَبْغَا
يُومْ لْوْغَا
مَاضَهَا يَمّْ جَاحْدْ اَبْوَرْغَا
جَحْدُ اَحْرَامْ
وَسْلاَمِي لـَلـْمَاهْرِينْ وَالْحَضَّارْ
وَعْلَى اَشْرَافْنَا لَخـْيَارْ
وَعْلَ لَحْبَارْ
مَنْ دُونْ اَلْبَاغْضِينْ وَالنُّكَّارْ
اَقْلُوبْ الضّْلاَمْ
غَنِّيتْ فْطَاعَتْ اَلْغْزَالْ نْقـُولْ
لُوصُولْ بْلُوصُولْ اَتْصُولْ
لَهْلْ لُوصُولْ
مَادَامْ اَلْحَالْ يَنْتْقَلْ بَفْصُولْ
لِهَا اَغْلاَمْ
الحربة
بَكْتَابي سِرْسِرْ يَا مَرْسُولْ
لمَراسَمْ اَلْبْهَا اَلْمَكْمُولْ
زَهْوْ اَلْعْقُولْ
رَاحَتْ رُوحِي اَلْعَانَسْ اَلْبَتُولْ
تَاجْ اَلرّْيَامْ | |
|
