قصيدة للشيخ المُتقِن توفيق أبرام

قصيدة للشيخ المُتقِن توفيق أبرام

الحربة:
رَدّ بَالك وَاجِي تنظرْ عَجْبْ العْجَابْ * يَا الوَالعْ فَنّْ المُوهُوبْ عَادْ سَايَبْ
القسم الأول:
باب رَحْبَتْ لكلام اضْحَى بغير بُوَّابْ * غير كـُوَّرْ وانشر ياك الضمير غايب
كل من هب أو دب حقير أو نصاب * أو غَشمِي شايط من صابتْ المصايب
جاب كلخة عوض الشـُّولي وقال عطاب * دار فيها علام فْسَرْبَتْ الغرايب
غابتْ الغنة والباقي نعيق لغراب * ما ابقى لا شداد ولا امْزَانْ طايب
شي ابْرَاغَزْ حسبوا ما فادهم لحساب * ما اخفاك حساب الحاسوب واش جايب
القسم الثاني:
سلم لاهل القريض واصغى واتأدب * والطاعة للشياخ راها مطلوبة
دوك اللي قولهم تابث وامرتب * ما قبلوا عيب ما ارضاوا المعيوبة
واللي عنـُّه ارضاوا لابُدَّا يشرب * من كاس امعتقة وخمرة مسكوبة
ما يدركها اجحيد نارُه ملهوبة
شاعتْ الفوضى فالحنطة وعم لخراب * سورها بعدَنْ كان امتين عاد رايب
شوف الحنش هايب والخيط صار ينهاب * الحمير تحرك والخيل فالزرايب
يا ازمان الخلطة فيك الصواب ينعاب * فيك شاف المَعْمِي فيك الرضيع شايب
هكذا رادوها من لا اقراوا لكتاب * الضبوعة صاروا يفتيوا فالنوايب
القسم الثالث:
الجاهل عامية ابصاره وامعصب * بافكار امظلمة انجاله معصوبة
ما باقي فيك يا الحنطة ما يعجب * الزاد اقليل فالخيام المنصوبة
الليث فريد والحمية كتغلب * ولات الضارية اطريدة مرعوبة
زاغت لوشاق بعد كانت مغلوبة
اللذي مثلي كابر فاصدور لقباب * ما يحرك ساسه من والف العتايب
ذق زربي يا من لا كر فيه تزراب * هاك مَقْلَاعِي والشحطة لكل نايب
لا تفايش باقوال الغير دون ترتاب * لا تعارضني بالربعة وقول عايب
خفت سيفي بعد الرفعة يقيس مجراب * ما بغيته يدنس بدماك يا الخايب
القسم الرابع:
اسمع قولي ولا اتعير لا تحسب * شعري موزون بالصروف المحسوبة
زايغ بالخامجة وفاسيادك كتغتب * وانفختي بالهتوف كربة مثقوبة
اللي مثلي غزير عرفُه ما ينضب * ما يعبا بالذي افكاروا معطوبة
جايب خردة امكرجة وبدا يخطب * اتقول حروزه بالمهامز مكتوبة
واللي سمعوا يقول هاذي والتوبة
يا الوالع لا تصغى للدني الكذاب * من ملات اجباحه بالقير والشوايب
لا ترافك سوقي ولا اتود مغتاب * لا يغرك بشطارة حدها اجلايب
يا تراث بلادي ساحوا دموع لهداب * ما ابقى لي غير الفقسة وقلب دايب
يا مَّاليا واسلافي شيوخ لاداب * ما بنيتوه ضحى خربة من الخرايب
ادخيل لك يا ربي بالهاشمي المجتاب * لا تحافيني يا ربي وليك تايب
توفيق الأسم وعلى سنون لحراب * دَكـّْهَا للداعي فالحلق والترايب