Admin
Admin
عدد المساهمات : 739
تاريخ التسجيل : 27/01/2008
العمر : 124
 |  موضوع: قصيدة المرشح نظم الشاعر أيوب كَلدي  الخميس 9 ديسمبر 2021 - 19:27 | |
| قصيدة المرشح
الحربة ؛
سالو داك القمَّار * المُرْشِّح الغايبة خبارو *
لله باش عامر قاع الشكَّارة؟
امراسك طال وجار * ما يتهنى عدَّاب وسط غارو *
ديما عل الحيوح رخيت الهرَّارة
القسم 1 ؛
سبحان من نشاها جبهة فوقَ لْبصار
ڭزَّار حومتو مادالو * كرشو مطلعة سروالو *
واللفت فلعشا يحلالو
قاري قرايتو فال * وسمو يقول علال
فْجَمْعَ لْحزاب كاري حنكو بيجارة
القسم 2 ؛
بان الجّران والحنش نيابو فلجوار
لُوراق والزواق آوعدي * حد المضا لسانو هندي *
حالو يقول هذا وعدي
نبَّار مايلو واد * معروف بين العباد
طبَّال كايقول الغيطة ستَّارة
القسم 3 ؛
مصيوڭ بالرباعة ويدور علَ لْديار
بمغرّْفة يْفَرقَ لْمرقة * هادي مْيا وهادي زرقة *
والبون ما خفى ف الورقة
فيها دجاج مسروق * واللي كلاه ملعوق
يَدِّي الزيت والقالب والخمَّارة
القسم 4 ؛
واللي سخا بصوتو كابكمة فَلْوْعار
غابة ذيابها يعراسو * ولقَرْع كايمشط فراسو *
سرَّاح طايحين ضراسو
مهما الناس ف الناس * هُوَّ عليه عسَّاس
سلُّوم غيّْسوه نعال الشفَّارة
القسم 5 ؛
عجب لعجاب عيش نهار تسمع لخبار
اللي تظن فيه مديَّن * ربَّى لحيّْتُو وتمسكن *
حتى رقى وصار امْكَّن
سالوه لاش مغبون؟ * وانتَ بمال قارون!
قال الحمار فاڭدتُّو بالطيارة
القسم 6 ؛
سالوه لاش باقي لزيادة فلسعار؟
وعلاش من قرا والأُمِّي * يتلاوحو فضيّْ وعتمي؟ *
وعل الفراش هُوَّ مغمي
جنِّي يجيه فمنام * فوصاف ولد آدَم
حمُّو يعيّْطو لو فبني شمهارة
السارحة 1 ؛
اصغى لي يا مسرار * حمُّو للأنسي قال في صيارو
نوصيك لا تلاَّ بين الفوقارا
كون آسيدي منشار * والبيليكي تخطى عليك عارو
من مال جد بوك بني لَكْ عِمارة
واللي ما عندو دار * الله يكون معاه في غيارو
عنداك لا يسلَّف يلقى ليدارة
ويلا يبغي لسوار * يقراها في خمسين ينحشارو
حتى يعيفها ويروم التِّجارة
يخدم خدمتْ لحرار * لمنڭي ورِّي ليه من خيارو
فبلاصتو بلاصي ليك السيارة
ويلا بالجوع انهار * داك الدعم ترفعو بلا شوارو
هاداك غير مرَّارة ف الدوَّارة
ويلا مات الكيدار * يلقى لملايك فلمقام زارو
ابلا زحام صبعين من المقبَرة
القسم 7 ؛
لَلْوان كلْوْجوه آما ردمو من جدار
دم البغال ولڭرعاوي * الحامضي مع السَّاماوي *
والحال يا العالي داوي
شلا زبال خلاَّو * وزقاقهوم نقَّاو
صبغو الناس بالشبة والطرطارة
القسم 8 ؛
لبرا فخيطهوم بلا عين بلا عبار
شي ف السرير دار زبيبة * والدرڭ درڭو بالشيبة *
ظن الهتوف زادو هيبة
شي ف الريوس رغَّاب * إِبوس كلّْ مجراب
شي مالقى يدير ألبس لو هنكارة
القسم 9 ؛
ولاَّو فلمنابر كلمُشّْ مع الفار
هذا لذاك داوي خاوي * والحاضرين جاو رشاوي *
التاج لبّْسو لضراوي
إِلا دوى يحيِّيوْ * ويلا هدا يغنِّيوْ
ويلا بكى تباكاوْ بكلّْ مهارة
القسم 10 ؛
وين العهود وين البلوَرة ولفكار
هاد البلاد هيَّ هيَّ * ما زاد غي صحاب البلية *
الدِّيپلوم جنب الغلية
ولحارڭة وليَّة * ولداتها بنيَّة
خلاَّتها فقادوس بلا قرقارة
القسم 11 ؛
هاد الخريف يمتى يتبسَّم بلزهار ؟
ويعود للمجاري ماها * طرقان فلقرى توطاها *
صبيان ف الشتا ترعاها
واللي مريض مشفاه * مع الطبيب يلقاه
ولد الفقير كيف اولاد الوُزَارا
القسم 12 ؛
هاك القصيد يا راوي ما حتْجَ لْعيار
من سوس حارسو مولانا * نعم الكريم ما ينسانا *
واللي جحيد ماشكمانا
كاظل بين ديجان * مشطّْحاه نيران
ما جاب ما دَّا فبروجي يتوارى
السارحة 2 ؛
وَلا ذاق المسطار * فكيوس الفن الزاهية وْتَارو
زرنان خاب سعدو فجواب الطارة
اللي ف العين صغار * عمْرو ف الشان يكون من كبارو
زفَّان ف اَلْعزو يستنَّى فلڭارة
وَاسَمْ ناظم لشعار * عشرة وعشرها خمسها يسارو
مقرون بالصبر واضح فَلْإِشارة
وسط الآية يذكار * ما بين ركان العلم عن حبارو
فصحُف طاهرة يترتَّل بجهارة
وسلامي ما يحصار * لشياخ الوهب الحاقَّة سرارو
ما فاحت البخور فڭور الحضَّارة
وَما نشدت لطيار * فوق الشرِّيف العالية سوارو
قصر اَلْمعان حصنو ما يقبل كارة
يا ربِّ يا ستَّار * ف المحشر تجمعنا مع برارو
تمحى جميع لُوزار بلا كفَّارة
تمت بفضل الله وبرحمته
أيوب ڭلدي
تارودانت | |
|
