Admin
Admin
عدد المساهمات : 739
تاريخ التسجيل : 27/01/2008
العمر : 124
 |  موضوع: رودانة ليك الله نظم الشاعر أسامة السماح  الجمعة 26 نوفمبر 2021 - 19:38 | |
| "رودانة ليك الله"
على قياس "الغزيل"
الحربة؛
يَا غزَالة البطَاح هْوَاك ملك لي ذاتِي
وَانا فحِيرتي من دمع النجلاَت
سعدَاتي سعداتي * نصِيح ولاَّ نبكي فخفُوت
رُودَانَة ليك الله
القسم الأول؛
سبحان ربنا من ودّك بكُل زين
لْحيا مع الصواب و هْمَّة و سكُون
و القْوام غصيِّن مسكُون
في حشَاه الدر المكنون
كنز و فنُون * شلاَّ حصِيت مفتون
آيَا المالكاني * صبّك فاني * من يلقاني
يضحى من غُلب حالْتي راتي
وانا لحالك رتِيت ا روح الذات
دمعاتي دمعاتي * السَّاجمة، دمعك ليها قُوت
كاتتهاطل مُوراه
القسم الثاني؛
لبهَاكْ بَايعت و لبهَاك أنا خدِيم
فسماك حُر بَازِي يصَرْصَرْ و يْحُوم
عن عدَاك يضيّق لْتْخُوم
او يخبّْر بانِّي مغرُوم
كُل مذمُوم * و كُل رَايس فقُوم
لرضَاك يَا الدَّامي * سِيفي حَامي * مع قلاَمي
يكفَى يكفَى نحِيب زْهْرَاتِي
يكفى فعَال الْوشُوق، القلب كوات
بسكاتي بسكاتي * جنيت شُوك المحنَة فالفُوت
لاش ا راسي و علاه !
القسم الثالث؛
يا دُرةْ الْعوَاتق يا باشْةْ كُل جِيل
بمحاسنك نفخر جهدي و نصول
من ذخاير كنز المنقول
و السراير لاهل المعقول
نصِيح و نقُول * مهما تغِير العدُول
نتي ضيَا نجَالِي * حُبك مَالي * كْيُوس حَالي
و الرقْبَان الحسُود غِي تَاتي
تْدِّي كْرَايحِي لْلسَّاسة الْمْوَات
فحيَاتي فحيَاتي * بغيت نتعزَّى هِي المُوت
ايلاَ خنت: آلاوَاه !
القسم الرابع؛
مغروم و غرامك قالو شرطو صعيب
نفدِيك يا وْليفَة في كل حرُوب
من تعدى يضحَى معطُوب
و يتقدى مني لْنشُوب
قوم الْكذُوب * تسيَاسهُم مغلُوب
هذا علاَش رَابِي * ملِّي صَابي * مْعَ حرَابي
ننشد و نقول مُوجنَا عَاتي
و سفينةْ الْقْرَاصن تلْقَى لْشتَات
بلاَّتي بلاَّتي * على الْعدَا ظلاَّم اليَاقُوت
و اليُوم انَا نبَّاه
القسم الخامس؛
نسعاك بالنبي يا مولانا يا مْجيد
تجود بالنصر عن حُرة الغيود
ضد فاهل الزيغ الْمشهود
خالفوك و طاعو الْيهود
ضحاو فسجود * لْصحاب كل تلمود
و انا علَ الشادي * هبت نشادي * مع فآدي
مهما تقوى حمال سيَّاتي
نرج الكريم يغفر و يمحي ما فات
ما ياتي ما ياتي * عز و نصر حقًّا مثبوت
يجود يجود الله
ليلنا المسلطن مهما يزيد محناتي
سرعان ما ينهزم فالسرويات
حجاتي حجاتي * نجوم كن جنود علَ سْرُوت
و الغالب هو الله
و الغزالة تزهى و تزيد لذ نشواتي
و تقوم بالفخر و العز و الخنات
سقواتي سقواتي * سقيتها من زينة لْنعوت
و نقول الله الله
من بهاها نشفى و السعد بارز مْواتي
سبحان من نشاك ا تاج الخودات
بهجاتي بهجاتي * تعود بعدن راح الطاغوت
كيفما راد الله
روي عليَّ يا حفاظي و صون نسجاتي
هادي جواهر زماني عد ابيات
ماياتي ماياتي * صول بيها و فخر للموت
و الباقي هو الله
علَ لْسلام سلامي هبتو فطرز نغماتي
نسعى الحي الرحمة لْلِّي مات
سعداتي سعداتي * بمن ترحّم عنِّي فالموت
و الراحم هو الله
يا الحافظ قل السمَّاح هيّْ نسباتي
او زيد قل روداني ما يُبهات
معناتي معناتي * الغالية ما تعبى برتوت
هي من فضل الله
أسامة السماح، تارودانت | |
|
