Admin Admin
عدد المساهمات : 739 تاريخ التسجيل : 27/01/2008 العمر : 124
| موضوع: قصيدة علام الموهوب في رثاء الحاج أحمد سهوم نظم عبداللطيف خوسي الثلاثاء 24 نوفمبر 2020 - 6:58 | |
| قصيدة: عْلَّامْ ٱلْمُوهُوبْ عبد اللطيف خوسي
الحربة غابْ نجمُو وجْنحْ لْغروبُو الوٰعدْ لْگَاهْ والْحرُوفْ بْهْجرُو مْنكوبَة عْلَّامْ المْوهُوبْ
1 قال يا ناسيدي مْگواه صْدّْ نورُو وْخْبَا خْلفْ الحجُوبْ مكتُوب في كتابْ الغِيبْ مْكتّْبْ عند ربّْ الحق مْرتّْبْ يا العاقل لا تْتعجّْبْ كان زاهي يضوي بْشهوبُو سَاطع ببْهاه بِين ناس القُولْ المُوهوبَة يُوفِي بالمطلوبْ
2 قال يا ناسيدي حرفُو عْفيفْ صادقْ ما يْنهلْ من كْذُوبْ لَا غْرّْتُو وجِيبَة وَلَا وجبَة ولا رضا يقصْد شِي عْتبَة رْقَى بْوْقْرُو بِين الوْدْبَا شَاهدْ على قْدرُو مْكتوبُو الله الله يا الراحم وْشملْ بالتُّوبَة عْلَّامْ المُوهُوبْ
3 قال يا ناسيدي علَّام حِين يْحْرْكْ بْجوَادُو فالحرُوبْ علَّامْ تحْتْ مْنُّو سْرتِي عْربِي فْصيحْ ينْدْهْ حْرفْ مْغْرْبِي كْذَا هْوَاهْ وْسْمتُو شْعبِي حِين يرْكْبْ يْعجْبْ فْركُوبُو يصُولْ يْجُول فالقوافِي من غير صْعُوبَة بمتِينْ المْركُوبْ
4 قال يا ناسيدي لْمَّاحْ من شْفِيفْ المْعنَى جَاب العْجُوبْ ومْثَال من فنُون القُول عْجِيبَة مْنْعّْمَة بغْلَالْ خْصِيبَة عْطا جْوَادْ كْرِيم وْهِبَة منْ دْخُول قْصِيدُو لْزْرُوبُو ثْقّْفْ حرفو وْأْدّْبُو بْرْقايْقْ مجْلُوبَة منْ رَايْقْ الكْتُوبْ
5 قال يا ناسيدي تَارة وْضِيحْ تَارَة يْلْمْزْ فْهْمْ القْلُوبْ وسْمَا بْمايْتُو لمْنازْلْ الاقْطَابْ مْن جْوَاهرْ حْكمْة الاعْرَابْ ضَابطْ اوزَانُو دُون اعْطَابْ مْنْ عسُولْ الشّْهدَة مشْرُوبُو نْزّْهْ فْنُّو وْبْرّْأُو مْنْ عَارْ التّْغْرِيبَة وْ سْقِيمْ المْكتُوبْ
6 قال يا ناسيدي نْجْمُو نْبَا فْأَرْضْ النّْخْلَة أَرْضْ الجْنُوبْ حُبّْ ٱلْاوْطانْ مالْكْ مُهجْة قْلبُو وْمَايتُو نْبتَاتْ فْتْربُو فِيه شْقّْ مْسالكْ دْربُو جَال وْخْبْرْ غْمقَاتْ دْرُوبُو مْن طِيبْ هْوَاهْ هْبّْ حرفُو فْوَّاحْ بْطِيبَة كْنْسِيم فْالهبُوبْ
7 قال يا نا سيدي سُهُومْ كان سْهمْ يْخْرّْقْ وْجْه الكْذُوبْ شُوكة فعِين دَعِي وْهْبُو خابِي آقْتاحْمْ المُوهوب رْكَابِي وْتَاه وْسطْ بْهِيم غْرابِي وْكلّْ غَبِي مْفتُونْ بْتُوبُو يقُول آنا فْرِيد وْقْتِي لَا فِيَّا عِيبَة وَلَا دْرتْ ذْنُوبْ
8 قال يا ناسيدي رْبِّي وْيَا العَالْمْ بالخَافِي فْالغْيُوبْ زْكِّي مْقامْ قْطْبْ الحْرفْ الطِّيّْبْ بْعدْ زِينْ حْضُورُو غِيّْبْ سابْ حَبْلْ الگُولْ مْسِيّْبْ جُودْ بْعفُوكْ وْزِيلْ ذْنوبُو واغفر لُو مَا مْضَى وْجاوْزْ زْلّْة ٱلعيُوبَة يا ساتْر العْيُوبْ
غابْ عام الوَبَا وْكْرُوبُو وْالأَرضْ بْهْمّْ شَاكيَة مْضرُورَة مْنكُوبَة والكُوكْبْ مْعطُوبْ
ٱلشّْمَالْ مْجافي لْجنُوبُو وْالوَبا بِينهُوم يْقْطْعْ بْنْصالْ رْهِيبَة وْ يزِيدْ فْٱلعْطُوبْ
باكية منْ لّْفراق شْعوبُو كْمْ مّْنْ ٱرْوَاحْ رَاحلَة بالحْمَّى مْسلُوبَة والخاطر مْسلوبْ
كْمّْ مْنْ بِيت رْثَا مْحبُوبُو وْكذَاكْ رْثِيتْ مْنْ ٱحْبابِي ثُلَّة مْحبُوبَة وْرضِيتْ المْكتُوبْ
الزّْمانْ ٱخْتْلفَات دْرُوبُو ما بِين طْرِيق سالكَة وْطْرَايقْ مْزْغُوبَة تْصطَادْ المْزْغُوبْ
كِيفْ يْنفْع رَاكْب مْركوبُو؟ كيف الكْسَّابْ دُون دِينْ تْنفْعُو مْكْسُوبَة منْ زِين المْكسُوبْ؟
يَا القَادرْ حْقّْقْ مْرغُوبُو منْ رادْ السّْلمْ والسّْلامَة وجْنْحْ لْلطِّيبَة فالشّْرقْ والغْرُوبْ
والكْلَامْ مْرتّْبْ تْرتيبُو لْاهْلْ الكلمة الرَّاقيَة وْالناس ٱلمْحبُوبَة فْجنَانْ المُوهُوبْ
فْالقرِيبْ يْحقّْقْ مْطلوبُو عْسَّى تْسگَامْ سَاحتُو بْاللّْمَّة القْرِيبَة تْتْوْحّْدْ القْلُوبْ
وَاسْمِي ٱسمْ الله رْقِيبُو عبد اللَّطِيف لا دْعَا بْشطَارَة فْزرُوبَة ولَا خَاضْ حْرُوبْ
لَا يْفاخْرْ وْ الحقّْ حْسِيبُو تسعِين معَ مْيَا وْخْمسَة حْسبَة مْحسُوبَة يا فَاهمْ الحْسُوبْ
وْالسّْلَامْ نْرفعُو وْنْهِيبُو لْلشَّافْعْ بَالغَة صْلَاتِي مَافِيهَا رِيبَة وَلَا شْكّْ يْشُوبْ
عبد اللطيف خوسي مراكش يوم الإثنين 7 ربيع الآخر 1442 / 23 نونبر 2020 | |
|