قصيدة الحراز حراز اعويشة نظم المكي واجو الضرير

قصيدة الحراز حراز اعويشة
نظم المكي واجو الضرير ذفين العرائش

الحربة
يامن هو يصغى لييا اسيدنا
كيف اجرى بين العشيق واعويشة والحراز
حراز احكيم من الحجاز

حراز احكيم من الحجاز . واطلع للغرب على البراز
قاري جردابية . اديال رومان الازرق ياافهيم . واميسر كذا من احكيم . قاري علم التنجيم . كاايحقو واشجيع الفرصا . وامعلم في حرب النسا . ومبلي باالطاسا . وسالباه الجلسة بين البنات . جال امدون وقريات . خاصاه اغزالة عنها ايدور . فتش المداين والدشور . يوم اوصل لازمور . صاب بنت اظريفة . عذرة وباهية ولطيفة . فاالعود كااتخبل واتصيح امعاه . باالحجازي واشغال الشام . صايلة بيهم عن جمع الريام . واعيوط الغرب مع الكلام . وبنت اطناش العام . عندها فاعمرها . عندي كابرة فاالعشرة . ولا اتصيب عني صبرة . في كل يوم ماتخطاني . حتى جا الحراز . امطور فاالبلاد . باعوها لو حساد . كايحسدوني فاهلال العياد . وعمل عنها لارصاد فالقصر . واسكن بين الواد والبحر . واتملك بيها . وملكاتو الغزال العذرية . ياسيدنا
واحكم عنو مير زينها . واظفر باالحراز
واعمل لرصاد على المكاز
قسم
غابت عني تاج الابكار فا سبع أيام افقدت الخبار
صبح عني بشار . جاوبشرني بخبار الغزال . عند الحكيم يا من اتسال . من جانا للمغرب باالسحر . ارصدها في ذاخل القصر .سلباتو باالزين والشعر . والشامة والخال والشفر . والعينين اكوابس الغذر . والخذ العكري ابلا اعكر . والمعنى فاالنقط والشعر . ونانتطور . قلت ليه اجميع اصحابي اطيار . وانفرقو عن تاج الابكار . ونعجب بيه . الى اعطات فيه الوجبة . بمحاربة . درت اخصايل المغاربة . زولت اجلابة . ودرت كسوت قاضي . الكتاب دايرو فاللبدة . تسبيح اليسر فايميني . اللحية كااسلوك الفضة . اوصلت باب القصر . نطقوا الارصاد . تايقولوا اتجاوب يااحكيم . واخرج حراز الريم . قالييا اش اعنابيك . يا امغربي . وانطقت وقلت ليه . أنا قاضي البلاد جيت . نتبرك منك يااحكيم . ونطعمك في حق الكريم . تمشي عندي للدار للضيافة . وانطق هوا وقالييا . معتزلي . مانامنشي في بعض الاسلام . وماكولك عني احرام . انت قاضي خذاع . روح في حالك . صد علييا . اسيدنا . واش القاضي كاايكون مثلك جيتي هماز .
واطلع لقصرو كن باز
قسم
حراز امطور باالاشكال و نا نرجع لو باالحيال
صاحب سدي رحال . درت عشرة بكطاطي صايلين . وامقارج ليهم طايبين . واشمعهوم مشعولين . والبنادر عشرة متسخنين . واحنايا جادبانين كاملين . واقصدنا باب القصر . نطقوا لارصاد . ابداوا تايقولوا اتجاوب يااحكيم . واخرج حراز الريم . كن جن امطور . عينيه كايدوروا في راسو .زدت ليه .سلمت عليه اغفل . كاع مارد علييا شي اسلام . قلت فاقلبي ولد الحرام . اجذبت عليه وقلت ليه . قل امرحبا بأهل الكمال . تعرف سدي رحال جدنا . وانتيا جيتي لغربنا . لازمنا نوريوك سرنا . ذخلنا للدار والقصر . واكرمنا باالعود والزهر . جبنا ليك السر والستر . والظالم ساقر . ليس جاوبني عن هاذ القوال . عاد اتلفت لييا وقال . نعرف سدي رحال حق . ولي الله اكميل . ليس نبي ولامرسال . جبتولو مذهب هاذ الحيال . وانتوما ياعشرة اطوال . واكطاطيكم كيف الكبال . واركابيكم كيف اجمال . والحادشكوم ختال . جابكم انتوما الحمية. اسيدنا
ودار فالارصاد قال كرموهوم باالعكاز
واسلت انا بين الغراز
قسم
حراز ارهيب اقديم فات واحكيت افعالوا للبنات
قالوا لييا الشيخات . ياالعاشق نمشيوا امعاك . بالرباعة
واطناش من البنات . غير الخوظات الفايزات . اتلاتة مولوعات . صايلات بانقط الكمنجات . واتلاتة عوادات تاقنات الآلات على التبات . واتلاتة طرارات حافظات اقصايدهم والبيات . واتلاتة رقاصات كاايسلبوا من كان اقديم تاب . وايردوا الشايب للشباب . ينسى شيبو . وانطقت قلت ليهم . هذا هوا النزول . هاذ الحيلة هي الذخول . قامت بنت الباتول . لبستني كسوة ذهب واحرير . ونا باقي زين واصغير . لا لحية . لا شارب . كن عذرة . كي هدت للصيام . العيون اجعاب اروام . والخذود اورادا . والفم كااخويتم واشفايف لاوين . قومان ابحبي كاويين . والتحليقة جمعات المطاوي . واتلحفت ابحايك المحربل . قالوا البنات . ياالشيخة زيدي قدامنا . سميناك امي يامنة . درجوا البنات وجات لالة مليكة . هي وخيتها فطومة . والريم حادة . والسعدية والغزال زهرة . واعبوش وراضية . ومنانة والزاهية . وارحيمو واخديجة . ولالة حبيبة هاذوا اطناش . درجوا بامشاشي والقماش . والماعون امقوم . وكل عذرة نحكيها شي اغزال . كاتطعن من شوف النجال . والقصة يا علال . حين زدت انيا قدامهم . فالحين وصلنا للقصر . نطقوا لارصاد . ابداوا تايقولوا اتجاوب
يا احكيم . واخرج حراز الريم . شافنا بندقنالو باالجميع . وادويت أنا ذغيا امعاه . واطلبتو ضيف الله . وقالييا امنين أنتم . قلت لو جينالك من فاس . يااحكيم انت عز الناس . جبت ليك ارباعت لوناس . للزهو والنقط مع الكاس . والسرور وسلوان . امعاك فاالقصر . والظالم ساقر . تايمسق فييا . وانشوف فيه يظحك ونا فرحان . قلت غاذي نذخل . وادوى وقال ليا . فين الشيخة . قلت لو أنا هي يااحكيم . قال انتيا حصلة . وجايا عندي بامحلة . شوفي شي قشلة اتبيتك . يابنت الزغبييا . اسيدنا
انتيا واطناش خصكم طباخ وخباز
روحو للحارة اكراز
قسم
ابقيت انخمم ياافهيم باش انولي عند الحكيم
هندزتو واجبرتو . ارهيب حايل . وامطور بالحيال . وابقيت انخمم فاالفعال . قلت ياراسي العبيد . كاينفعوا فاالحزة . غير زيد . جرب فالك لاهو اسعيد . قلت لهم ياالعبيد . درت هاذ الدردبة فالقصبة عند الحكيم . قالوا لييا نمشيوا . غير قوم راسك . وادويت قلت ليهم درت المسوس . والبسيسة والزميتة . ودرت ذغنو . واجبابن داالحليب . عمرت البيدة باالودع . ودرت اكساوي الملوك . والطبيقة والحكوكة ذاالبخور . قومت اكناوة فاالظهور . باالقرقابات وكانكات . ايطلقوا شي مايات . والخذم ايجذبوا . واطبول كاترعد . وصلنا للقصر . نطقوا لارصاد . ابداوا تايقولوا اتجاوب يااحكيم . واخرج حراز الريم . شافنا وابدى يظحك . قال زيد . لاش اقدمتوا أيا اعبيد . زدت انايا عندو وبست يدو . وانطقت وقلت ليه . أنا عزي بلخير . جيت عندك صالح ابلادنا . وقالوا ليك اسيادنا . دارك محسوبة دارنا . ذخل هاذ الميدة للالة . وطلعها يا احكيم . وافرح بينا . العبيد مااعليهم حجبة . خذامين ناس الرحبة . وادوى وقالييا . تريكت حام . ليس فيكم صالح . العبد الى اشبع . ايولي يفسق . ويلا ايجوع . ايولي يسرق . منكم اجميع الادييا. اسيدنا
لواتجبروا الحكام . كلكم اتحرقواباالكاز
ذهبوا ياجبهات المعاز
قسم
وارجعت لعندو يا ارسيخ غير ابوحدي لكن شيخ
امعايا هجهوجي . امتحف وبهجاوي . بلغة امفرقة . والخيط على الراس . والتعكريطة والخنجر . والحيالة واجهد مع الصغر . وانصرتو في باب القصر . وانطقت باسرابة مع القصيدة . نطقوا لارصاد . تايقولوا اتجاوب يااحكيم . واخرج حراز الريم . قامت اعويشة تبعاتو . امنين سمعوا صوتي . وقفوا ابزوج . اغنيت عليه وسرت كاانقرح . نسمع فيها اتقولو . هذا شيخ أديب . يا احكازي . دابا يذخل . لا اتزيد علييا حتى اكلام . ايفرجنا هاذ النهار . قال لها ياسود الاشفار . مانبغيه ايشوف في اخيالك . ما يذخل للقصر . قالت لو تسمع يااحبر . احنا فالغرب . الشيخ والنسا . خاوة فاالجلسة . لا اتقشب عنو . اخرج قول ليه امرحبا . وارمات على الذيب الخشبة . واحنى اقفاه . واخرج عندي ونا كانقرح . حتى كملت القصيدة . من سبعة داالقسام . وزاد اسبقني للسلام . زيد امرحبا بيك ياالشيخ . هذا يوم اسعيد . قالييا بوجود الحاكمة . ظحكات عليه الظالمة . وقالت لييا ذاالشيخ . زيد بيك امرحبا . كونت عنها فاالحسبة . واذخلنا لقبة شلا نوصف . صنعت الحكاما اياافهيم .انا والدامي والحكيم . مسق فييا وادوى وقالييا . كب ودندن ياامغربي . وارفدت الكنبري . وسرت انقرح . وانقول فاالقصيدة باالغوس . ياباشت العوارم كيف المعمول . كاتجاوبني فالغنة . اتقول لييا كرصي . داباانريد باش انشمس . حتى ابغات وارشق ليها . ساوات عودها فايديها . وابدات كاتخبل وتطيح عليه . باالتواشي . واتطيب فيه بااللطافة . وارمات ايديها لجيبو . جبدات الخاتم . والطاسة واقضيب الرصد . وطارت لذيك اجيهة ياافهيم . قالت لو تسمع يااحكيم . هذا هوا محبوب خاطري . وأنت عذبتيه يا الظالم كي نعملك. هااحكمتك حصلت في ايدييا. اسيدنا
دابا ولي قرد زيد فرجنا فاالتنقاز
وشحطاتو باقطيب باز
قسم
رداتو قرد امجاذبي وقالت لييا ياطالبي
هذا هوا العدو . الي افرقنا هذي عشرين يوم . هاني حصلتو ليك . واش صافي شغلي . ولالا . قلت ابرافو يالاللة. قالت لييا الحبيب . هاالخاتم والطاسة والقضيب . واقعد نزهاوا ابزوج فالقصر . والحراز ايشوف باالنظر . وامعاه اندبر . يااحبيب الخاطر . والتواشي باش اقدمت عندنا . ذيك التواشي حافيين . لو جيتي شيخ أديب. كيف دابا . كن اذخلتي للقصر . تظفر بييا ياالشيخ . قلت لها هذا مااكتاب . صحة ليك يابنت الصواب . سمعي مني الخطاب . حرمت اخذودك ياسود النجال . اذخيل السالف والدلال . عفة للرجال . ياالعذرة هاذ الحراز . رجعيه ابنادم . وادني العفريت ايشيلو للحجاج . ايديه لعند أمو اتقفزو . ويتعلم حرب النسا . قالت لي علا واعسا .
مانفعل الا مااتريد . جبدات الطاسة والقضيب . واطلع عفريت ازرق . قال ليها ادنيني ياغزال . قالت هاذ الحراز عذبو . وديه للحجاز سيبو . شيلو يااعفريت . تم شالو وازعق وساربيه .
قالت لييا البهييا اسيدنا
أجي يااحبيبي انعذبو باباه باالتكراز
والحراز امشى للحجاز
ياك أنا زمورييا اسيدنا
واترابي المحارفي قلت ياسيف الهماز
من حازك عل الحسود فاز
قلت لها سمعي لييا اسيدنا
انت لي حكمة وفايدة ياعينين الباز
من ذون امزاح ولا اطناز
خوذ المعنى حسييا اسيدنا
ولغي من خلطة امخلطة باالتمر مع الغاز
والحلوف السمين والمعاز
والمولى يسمح لييا اسيدنا
ماشفت اعويشة ولا الدابزت امع حراز
ولا نحمل قوم الدباز
غير فراجة واسجييا اسيدنا
قال المكي جول فااللغى يافاهم لرماز
واجمع واطوي شغل الدراز

تمت

» قصيدة الحراز نظم الشيخ المكي انشاد مولاي عبد الله خي بات
» قصيدة اعويشة أداء الشيخ الحاج عبدالكريم الصادقي الهلالي
» قصيدة البراقية نظم الشاعر أيوب المكي الفاسي
» قصيدة الحــــــراز
» قصيدة حراز طامو نظم محمد بلحاج