Admin
Admin
عدد المساهمات : 739
تاريخ التسجيل : 27/01/2008
العمر : 124
 |  موضوع: قصيدة لخروف الغالي نظم الشيخ توفيق أبرام  الأربعاء 7 أغسطس 2019 - 17:42 | |
| قصيدة لخروف الغالي نظم الشيخ توفيق أبرام
ق1
الخروف اللّي ساومتو غلا عليّ
مانويتو هاد المرة يكون ساوي
قلت بيه نضحِّي وليتلو ضحيّة
يا محنتي يانا هاد الزمان كاوي
من غلاه ترك في جيبي ميات كيّة
والكتوب المدرسية مع الكساوي
كلّهُـــــــم يجبــــدوا والا رتــاو ليّ
باش فادوا قطبان مع الجيب خاوي
ياك سنّــة مولانا رادها فديّـــة
لاش لكريدي والزِّيار والدّهاوي
ق2
فالاسواق الشنّاقة والقطاطعية
غير ساوم يبداوا عليك بالسّماوي
ماخفـــــاك المضّايا والمجامـــرية
والتبن بالكيلـــو ينباع فالقهاوي
كل من هب ضحى كًزّار بالسميّة
لا صلا لا صنعة ويفوح بالجناوي
يا الدّاخل للسّوق ادا صغيت ليّ
ردّ بالك وتحزم لا تكـــون هــــاوي
لا تبــــالي بخــروف بطانتــو نقيـــــة
والفــراقـش ولا لقـــرون بالتّْلاوي
عند شوفو صردي وفداخلــو قنيّة
لا تآمـــن لوجوه الشّــر والرّعاوي
ق3
عنـــدنا كسّــابا صــاروا شــــلاهبية
كل عام يجمعوا فالسّحت والدّعاوي
مايعملـــــو خاطــر ليتيــم والوليّــــة
والموظّْف حطّ المصروف بات زاوي
بغيـــت ربّي يبليهـــم بالفـــراقشيـــة
والكســـاد و قـــلّة فالــزّاد والبــلاوي
مايسلبـوه صباح يـزول فالعشـية
والذي رابي علّ لحرام مايساوي
الحسان بالحسان الخير فالسخيّة
يا قلوب الجلمود حسابكم خاوي
ق4
ذا زمــان النصّابــا والنواعرية
دوخونا بانواع الطّنز والفتاوي
هاك قول مصفِّي وقرايتو وصيّة
يا الحافظ حلّة طرّازها سلاوي
تا وفا بعد الوا والقاف تابع اليا
ذاك اسم ناظم لاشعار يا الرّاوي
لا تشاور ملّا غرزاتلـو سجيّــة
لا تبالي باصحاب الفيش والتّناوي
مايدوم الا ربّي كامل العطيّــة
والّدي ناكر فضلو فالضّلال هاوي | |
|
