قصيدة الْعَانِسْ نظم الشاعر إدريس رحمون

قصيدة الْعَانِسْ

نظم الشاعر ادريس رحمون

مبيت ثنائي

القسم الأول
حَرّْ الْشْوَاقْ خَرْقْ احْشَايَا وَدْْخَالِي وَقْلِيبِي مَكْلُـــــومْ وَالْعْقَلْ مَتْبَــــالْ
امْحَايْنِي ازْدَادُ وَقْــوَا تَهْوَالِـــــــي عَنِّي ضَافْ الْحَالْ وَالْوْسِيعْ اَئْزَالْ
طَالْ الْغْيَابْ هذِي مُدَّا مَــــــادَالِي وَالْهَاجَرْنِي مَــــارْسَلْ لِي مَرْسَالْ
كَُولُو لْعَانْسِي وَلْفِي جَدْيْ الْفَــالِي لاَزَلْتْ انْرَاجِـــي امْجِيكْ يَالَغْزَالْ
القسم الثاني
هَانِي مْعَ الْغْرَامْ انْقَاسِي عَدِّيتْ قَيْسْ فَتّْ اقْيَاسُو
تَارَا نْهِيمْ فِي تَهْـــوَاسِي وِفَقْدْ سَاكْنِي يَحْسَــاسُو
تَارَا نْسَاهْرْ الْعَسْعَاسِي وَالجَّفْنْ يَنْجْفِيهْ انْعَاسُو
لاحَالْ حَالْتِي مَنْ لــــَهْوَا عَمْدَا لِي وَالْمَالْكْنِي لِيسْ جَابْ خَبْرْ الْحَالْ
مَنْ سَاحْتِي انْفَرْ عَزّْ احْبَابِي رَالِي شَدَّكَْنِي فَجْمَالْ صُورْتُو وَنْضَالْ
اَمَا صْبَرْتْ وَكْتَمْتْ السَّرّْ افْشَـالِي صَبْرِي عَدَّا يَـاهْلِي صْبَرْ لَبْزَالْ
كَُولُو لْعَانْسِي وَلْفِي جَدْيْ الْفَــالِي لاَزَلْتْ انْرَاجِــي امْجِيكْ يَالَغْزَالْ
القسم الثالث
لازَلْتْ كَانْرَاقْبْ اقْدُومَكْ وَنْقُولْ بَالصّْبَرْ نَتْحَـــــــــلاَّ
يَكْفَا تْعَذّْبِــــــي مَحْبُوبَكْ قَاسِيتْ مَنْ صْدُودَكْ شَــــلاَّ
زُورِي عْبَيّْدَكْ مَكْسُوبَكْ لُوصَالْ مَنْ خْصَالْ الْفَضْلاَ
يَمْتَا تْزُورْنِي سَلْطَــــانَتْ لَغْوَالِي مَدْرَا عَنْدِي تَلْبْهَا يْحَطّْ لَرْحَـــالْ
وَنْقُولْ سَعْدْ سَعْدِي وَفَــانِي فَالِي بُوصُولْ الْهِيفَا الْعَـانْسْ امّْ ادْلالْ
مَنْ لاَ نْظَرْتْ زِينْ امْثَلْهَا بَنْجَالِي لُولِيفَا مَالِيشْ عَوْضْهَا فَالْبَـــــالْ
كَُولُو لْعَانْسِي وَلْفِي جَدْيْ الْفَــالِي لاَزَلْتْ انْرَاجِـي امْجِيكْ يَالَغْزَالْ
القسم الثالث
مَدْرَا تْزُورْنِي مُـولاتِي مَاضَاعْ لِي نْقُولْ افْدَاتُو
حَضْرَا نْقِيمْ يُومَنْ تَاتِي فَبْسَاطْ سَلْطْنِي فَنْعَــاثُو
لِهَا نْقُولْ كَــاسِي هَاتِي مَنْ خَمْرْ طَيّْبَــــا لَذَّاتُو
خَمْرَا قْبَلْ مْنَ اخْلُوقْ اكْرَمْ لَدْوَالِي صَهْبَا مَخْتُومَا فْقَـــــــــادْمْ الاَزَالْ
وَحْنَا فْهَــــــاكْ غَدَّرْ وَمْلاَ وَرَا لِي غِيرْ اَنَا وَوْنِيسْتِي وْكَاسْ الطَّـــالْ
وِيلاَ تْضَمّْنِي لَصْدَرْهَا شَمْــــلاَلِي تَلْقَا مَنْ فَرْطْ السّْرُورْ دَمْعِي سَالْ
كَُولُو لْعَانْسِي وَلْفِي جَدْيْ الْفَـــالِي لاَزَلْتْ انْرَاجِـــي امْجِيكْ يَالَغْزَالْ
القسم الرابع
يَاشَمْسْ وَقْتْ لَـــعْتِدَالِي يَابَدْرْ لِيلَةْ انْتِقَـــــــــالُو
يَاتَاجْ صُولْتِي مَعْصَالِي يَانَبْضْ سَاكْنِي وَزْهَالُو
يَامَنْ اخْيَالْهَا يَنْبَــــــالِي وَنْخَرّْ كُلّْ وَقْتْ اقْبَـــالُو
يَارُوحْ رَاحْتِي وَمْظَنَّةْ امَـــــــــــــالِي يَاوَلْفِي وَنَّاسْتِي غْدُو وَأْصَـــــــالْ
يَامَنْ تْهَابْكْ اسْلاطَنْ وَ الرَّأْبَــــــــالِي يَامَنْ نَلْتِي عَزّْ وَ الْمْجَدْ وَأْثَــــــالْ
يَاوَجْهْتِي وْشُورْ اهْلَ الْعْشَقْ ابْحَــالِي اشْوَاقِي شَاقُو لْحَضْرْتَكْ فَالْحَـــالْ
هَلْ وَاشْ بَلْوْصَالْ اتْجُوكِي بَسْخَــالِي نَغْنَمْ بَالنَّظْـــــرَا فْقَدّْكْ الْمَرْفَـــــالْ
اَنَا فْعَارْ حُضْنَكْ وَارَفْ لَضْــــــلاَلِي وَ الشَّامَا وَفْعَارْ حُسْنْ ذَاكْ الْخَـالْ
جِينِي وْبَاشْرِنِي بَلِّي يَزْهَــــــــــــالِي الْوَقْتْ ازْحَمْ وِ الْمْنَا عْلِيَّا طَـــــالْ
دْيرِي الْخَاطْرِي غَرْضُو يَا عَطْبَالِي قَبْلْ احْمَامِي لاَيْحَوّْمْ ابْلَنْبَـــــــــالْ
وَرْجَايْ فَالْكْرِيمْ الْحَيّْ الْمُتْعَـــــــالِي يُوفِي مَقْصُودِي وْمَاطْلَبْتْ النَّـــالْ
خُذْ الْمْعَانْ وَمْنَ امْوَارَكْ تَخْيَـــــالِي خُذْ ازْبَرْدَجْ وَالزّْمَرْدْ وَسْحَنْجَــالْ
وَسْمِي انْبَيّْنُو فَنْهَايَتْ لَمْقَـــــــــــالِي رَحْمُونْ افْمَرَّاكَشْ اَرْضْ لِهَا بَالْ
فِيهَا غْصَيّْنِي لَفْحْ وُطَهْجْ اكَْـــــدَالِي وُفِيهَا نَحْلِي ارْعَا نْعَمْ بَمْصَــــالْ
مَهْدِي عْرِيفْ بَلْدْ اَزَمُّورْ الْبَـــــالِي بَسْوَارْ احْصِينَا وْنَهْرْ عَقَّنْقَـــــالْ
كَُولُو لْعَانْسِي وَلْفِي جَدْيْ الْفَـــــالِي لاَزَلْتْ انْرَاجِــي امْجِيكْ يَالَغْزَالْ

» قصيدة فضيلة ..نظم إدريس بن علي
» قصيدة ربيعية -إدريس بن علي -
» قصيدة من التراث المغربي - نظم إدريس بن علي
» قصيدة الْعَانِسْ
» قصيدة اَلجَّــــارْ نظم الشيخ إدريس بن علي الحنش