قصيدة بولوحوش - نظم: الشيخ إبراهيم ولد الموشوم

قصيدة بولوحوش
نظم: الشيخ إبراهيم ولد الموشوم
بحر المبيت/ المرمة الرباعية

نَــبْــدَا بَـسْــم الله فالنّْــظـَامْ * سَبْقـَتْ هِيَّ سَـاسْ الـْكـْلَامْ * وَنْـثَـنِّي الصَّلَا وَالـسّْــلَامْ * اعْلى شَفيع المومنين
هَـاذِي قـَـصَّــة بَـحْــدِيثـهَـا * انْـهَــارْ الجَّـمْـعَـة ابْـدِيتْهَـا * عَـنْ بُولوحُـوشْ انْشِيتْـهَـا * كايَنْ فكـْتُوبْ اللوْلِينْ
دَايَــرْ خَنْشَـة بَشْـرِيطـْـهَــا * وُأمّْ اجْنِيبَــة فِــي خِيطهَــا * وَأنَا ابْعِـيـنِيَــا شــفــتْــهَا * وَالنّاسْ اعْلِيهَا شَاهْدِينْ
فِي سُوقْ الغْــزَلْ إيبِيعْهَــا * جَــاتْ الـمْــرَا وْقَـلَّبْـتـهَــا * دَارْتْ إيدِّيهَــا وُعَضّاتْهَا * وَالنَّاسْ إيهَرْبُوا كامْلِينْ
بَزّْ مَنّهَا مَسْكِينَة ازْگاتْ * فِي سُوقْ الغْزَلْ نَاضْ العْيَاط * النّاسْ اتْنَادِي أشْ ذَالشيَاط * اعْلَاشْ انْتُومْ امْجُوّْقِينْ
فَالخَضَّارِينْ نَاضْ الهْـرَاجْ * فَالسَّمَّارِيــنْ الغُـوتْ هَاجْ * وَالكثرَة فِي سُوقْ الدّْجَاجْ * ابْقَاتْ النَّاسْ امْجَمّْعِينْ
قَالتْ النّاسْ أشْ هَذا اطرَا * قالوا هَاذِي وَاحْــدْ المْـرَا * فِي وَسْط السُّوقْ امْوَعّْرَة * طاحَتْ سَخفانَة كاتْنِينْ
ادْوَاتْ الجُّــوقَــة كـُلـّْـهَـــا * قـَــالـُـوا انْقـدْمُوا لَاعَنْدْهَا * نَبْــدَاوْا بَعْـــدَا بَطـْـلِـيبْـهَا * لَانَضْحَاوْا مَنْ النّادْمِينْ
قَبْـطـُوهْ مَاحَــدُّه فَـالقْــرَبْ * جَرِّيـوْا اعْلِيهْ إلى اهْرَبْ * قَبْطوه وُطرْحُوهْ فَالتّرَبْ * احْسَنْ لَانَبْقَاوْا حَاصْلِينْ
اخْتَارُوا لو عَشْرَة اخْفَافْ * شَافْهُـمْ الزَّغِيبِـي وُخَــافْ * قبطـُوهْ زَرْزَاوَهْ بَالكـْتَافْ * ابْقَى جَالسْ تَمَّا احْزِينْ
جَــاوْا عَنْــدْهَا جِيــرَانْهَــا * شَــدُّوا بِــيــدِيـنْ وُلَادْهَــا * شَافَتْهُمْ گــاعْ عَنْـدْ رَاسْهَا * ابْقَاوْا احْــدَاهَا جَالسِينْ
فُـولَادْهَا حَايْـرَة كـَتْـشُوفْ * عِينِيهَا بَالدَّمْعَــة اتْحُـوفْ * فِي وَسْط المِيئَاتْ وَالألوفْ * تَقْطـعْ فَقْلوبْ الكافْرِينْ
ادْوَاتْ مَسْكِينَــة بَالشّــرَعْ * قَالـتْ يَا وُلَادِي لَا ازْرَعْ * لَا لحْمْ لَابَصْلة لَا اكْــرَعْ * لولَادْ صَبْيَانْ وُدَاهْشِينْ
سَــارُوا للقَاضِــي تـَالبْلَادْ * بُولوحُوشْ وَالمْرَا وُالولَادْ * جَلسُــوا گــدَّامُه يَا سْيَـادْ * عَنْدْ القَاضِي مَتْصَافِّينْ
قالْ القاضِــي مَابَــالـْكـُـومْ * عِيدُوا لِي وَاشْ اجْرَا لكمْ * وَأنَا گاعَــدْ نَصْغَى لكــمْ * اعْلَاشْ جِيتُوا مَتْدَاعْيِينْ
انْطــقْ بولوحوش بَالكلَامْ * هَاذ المْرَا شَتْهَاتْ الخصَامْ * بُوحَدْهَا طاحَـتْ فَالزّْحَامْ * وَأنَا كـُنْتْ مَنْ الدَّايْزِينْ
قامَـــتْ عَنّي وَدْعَـــاتْنِــي *مَنْ وَسْط السُّوقْ اسْتَاتْنِي * عَنْ شَغْلِي رَاهْ ادْهَاتْنِي * وَأنَا نَجْرِي عَلّْ الوَالـْدِينْ
المْــرَا مَسْكِينَــة امْغَـنْـبْـرَة * وَرَّاتـُـه إيــدْهَا لِـيسْــرَى * فِيهَا وَاحْدْ العَضَّة وَاعْرَة * قَالْ الَّلصْحَابْ الدَّايْرِينْ
دِيرُوا بُولوحُوشْ فَالسّْجَنْ * تَمَّا يَبقَى خِيــرْ لو احْسَنْ * هَــذا مَا هُــوَّ غِيــرْ جَــنّْ * ظاهَــرْ بَفعَالـُه نَاقْصِينْ
أَشْ اسْبَــابَــكْ يَا ذَالمْــرَا * عَنْــدَاكْ اتْكـُـونِي نَاكـْــرة * قَالـتْ لـُو صَنْعْتـُه ظاهْرَة * عَـرْفـُوهْ شبَّان وُشَايْبِينْ
اتْصَنَّــتْ لِيَــا يَــا سِيــدْنَا * هَاذِي اصْنَعْتُه بَــشْهُــودْنَا * يِبِيعْ الطيُورْ افْجَامْع الفْنَا * هَاذوا غِيرْ اللي حَابْطِينْ
دَايَــمْ فَالگــرْنَة كايْظـــلّْ * قَانِي لـَفْخَــاخْ وُكـَايْـطـَـلّْ * وَاشْ الطيرْ الزَّغْبِي احْصَلْ * عَنْـدُه قَـنْيَاتْ امْحَقّقِينْ
القُوبَــعْ دَغْــيَا يَقْبَطـْـهَــا * اگــرِيگــرْ فِيــدُه يْحَطّْهَــا * أمّْ سِيسِــي يَعْــرَفْ وَقْتْهَا * هَاذوا فَقْبِيطهُومْ سَاهْلِينْ
وَالحَكمَة فَقبِيـط الغْـرَابْ * قَانِي لـُو فِي تَحْتْ التّرَابْ * مُحَــالْ افْـقبْــرُه يُنْصَــابْ * حِيثْ هُوَ مِنْ الخَادْعِينْ
جِيوْا اتْشُوفُوا اشْهَاذ العْجَبْ * فِي بُوعْمِيرَة مَاذا اكسَبْ * يَقْبَط الحْنَاشْ گــدّْ الخْشَبْ * غِيرْ اللي هُومَا طَايْرِينْ
مَنْ غِيرْ شرَّقْرَاقْ وُالحْمَامْ * وَأمَّا الزّرْزُورْ ابْلَا اكلَامْ * يَقْبَط سَحّتْ الليلْ فَالظلَامْ * هَذَاكْ المَلگــوط الرّْكِينْ
*تِـيبِـيبَـــط تِـيبِـيبْـــط تِـيبِـيبْـــط *
تِيـبِيـبْــط بَـعْــــدَا مَــالـْهَـا * مَسْكِينَــة وَاشْ إيسَــالـْهَـا * حَتَّــى مُــوكــا مَــاقــالهَا * ضَرْبْهَا فالطيَاقْ الْعَالْيِينْ
يَضْرَبْهَا دَقّــاتْ الغْصَـبْ * وَلدْ الْحَتَّالْ يَعْرَفْ يَضْرَبْ * إيــدُّه فِيهَا غِيرْ العْصَبْ * عَنْــدُه دَقّــاتْ الحَاسْدِيـنْ
هَاذ الصّْغَارْ دَازْ اكلَامْهُمْ * بَـلَّارْجَـاتْ أشْ إيسَالهُــمْ * أشْ اكـْلَاوْا لِيهْ فَجْبَالهُــمْ * مَاشَــاء الله يَا مُــومْــنِينْ
مَنْ غِيرْ لطيَارْ اللي انْسِيتْ * وَلَايَنِّي رَانِــي اعْيِيــتْ * حَبِّيتْ انْقَصَّرْ فَالحْدِيـثْ * كـُونُوا تَصْغَــاوْا أفَاهْمِينْ
ألبُــو لوحُوشْ اكـْـلَامــْنَا * لَايَنُّــه مَسْكِـيـــنْ جَـــارْنَا * وَحْشُومَة انْدُوزُوا عَارْنَا * غِيــرْ إلــى كـُـنَّا مِـيْتِيــنْ
قُلْنَا زَعْمَــا انْطـَلـُّوا اعْلِيهْ * انْصِيبُوا خُوهْ يِشارَعْ اعْلِيهْ * وَالقَاضِي كايْخَاصَمْ اعْلِيهْ * وَحْـنَايَا بَحّْــرَا دَاخْلِيــنْ
قالْ القَـَـاضِــي أيَا احْبَابْ * رَاهْ انْتُومَا عَنْدِي اقْـرَابْ * أشْ ابْغِيـتُــوا يَاذَ اللبَــابْ * وَعْلَاشْ جِيتُوا مَتْلَايْمِينْ
قلنَــا للقَــاضِي يَا فـْـهِيــمْ * جِينَا انْطـَلـْـقـُوا هَـاذ لِيتِيمْ * لَايَنُّـه فَالحُــومَة اقْــدِيــمْ * اعْلِيـهْ احْنَــايَا رَاغْبِيـــنْ
فَقَـَـالْ القاضِـي يَا افْضَالْ * رَغْبُوا المْرَا اتْدِيرْالفْصَالْ * فَضِّيــوْا عَنَّا هَاذْ الخْبَالْ * احْنَا فَالـذعِيرَة مَسَّامْحِينْ
حِينْ سَمْعَتْ المْرَا ذَا الكلَامْ * بَرْكتْ عَلْ لـْقَاضِي بَالخْصَامْ * قَالتْ لـُو مَا اهْنَا مَاحْكامْ * فَا يَنَّـكْ مِينْ الظَّالمِينْ
بَحْـكـامَكْ مَانِـي رَاضْيَـة * هَانِــي للقَــايَــدْ غَــادْيَــــة * المَحْكْمَــة عَنْــدُه فَاضْيَة * وِيفَـَـاصَلـْـنَا بَحْكـَـامْ زِينْ
أَبُو لوحُوشْ قِـــلْ الهْبَالْ * هَاذ الْمْرَا تَعْطِيهَا ارْيــَالْ * بَاشْ انْخَتْمُوا هَاذ المْقَالْ * لَا نَضْحَاوْا مَنْ الخَاسْرِينْ
ارْيـَـالْ نَعْطِيكـُـمْ ضَامْنُـه * حَتى لـوقِيـتَـتْ سَـاسْـنُــو * بُولوحُوشْ النَّـاسْ تْاَمْنُـه * مَــاهُــوَّ مِــنْ الكـَـاذبِــيــنْ
الله الله مــــــــولانــــــــا * الله الله مـــــــولانــــــــا * الله الله مــــــــولانـــــــا * فَـبْــوَابَـــكْ دِيمَـا وَاقـْفِـينْ

» قصيدة سـاقي باقي نظم الشيخ بن سليمان
» قصيدة القلب نظم الشيخ محمد بنسليمان
» قصيدة الهلالية نظم الشيخ توفيق أبرام
» قصيدة الوصاية نظم الشيخ بن علي ولد أرزين
» قصيدة: "بَــــــــلّارْجْ"* نظم: الشيخ أحمد بدناوي