مْصْبَاحْ النِّيَامْ نظم: توفيق أبرام

مْصْبَاحْ النِّيَامْ (قياس الضيف)

بْاسْمْ الله الكْرِيمْ نْبْــــــــدَا فْكْــلاَمِي,,آسِيدْنَا
العالمْ مَاخْفَــــــاهْ حَالْ
الصّْلاَةْ عْلَى الرّْسُولْ وْكْدَاكْ سْلاَمِي,,آسيدنا
لحْبِيبْ اشْفَــــاعْتُو نَّالْ
حْسْنُو فْالْكُونْ لِيـــسْ دْرْكُـو آدَامِــي,,آسيدنا
مْنْ جَابْ الدِّينْ بْالْكْمَالْ
سْلِيلْ الشُّرْفَا الطَّــــــاهْرِينْ الْهَاشَمِي,,آسِيدْنا
مْعْصُومْ القُولْ وْالفْعَالْ

الحربة
صْلِّيوْا عْلَى الْحْبِيبْ مْصْبَاحْ انْيَامِي,,آسيدنا
مُحْمّْدْ خَاتْمْ الرّْسَالْ
ـــــــــــــــــــــــــــــــ
ق2
حُبّْكْ يَاغَايْةْ الْهْدَى,,فِي قْلْبِـي فَايْتْ المْدَى
شُوقِي لْمْقَامــكْ السّْعِيدْ
جْمْعْ الكُفَّارْ وْالْعْدَا,,فْالْــحِينْ ضْحَاتْ نَاكْدَة
بْدْعْوْتْكْ غْمّْــــهَا شْدِيدْ
اجْنُودْ الحْقّْ وْالفْدَى,,جَادْتْ بْالرُّوحْ جَاهْدَة
صَالْتْ بْصْوَارْمْ الْحْدِيدْ
×××××××××
فْهْوَاكْ اتَاجْ لُورَى طْبّْ اسْقَـــــامِي,,آسيدنا
لْمْشرّْفْ سِيدْ الرّْجَالْ
سِيدْ الْكَوْنِيــــن وْالثّْقْلِيـــــنْ اهْمَامِي,,آسيدنا
زِينْكْ مَاشَافْتُو انْجَال
اعْرْجْ بِيكْ الْجْلِيلْ لْلـــــدُّرْج السَّامي,,آسيدنا
يَابْدْرْ الْكُونْ فْالْكْمَالْ
انْتَ نُورْالهْدَى فْغِيهَــــــابْ ظْلاَمِــي,,آسيدنا
دْبّْب حْمْلِي اِيْلاَ ثْقَالْ

الحربة
صْلِّيوْا عْلَى الْحْبِيبْ مْصْبَاحْ انْيَامِي,,آسيدنا
مُحْمّْدْ خَاتْمْ الرّْسَالْ
ـــــــــــــــــــــــــــــ
ق3
يَامُولْ الْجُودْ وْالْوْفَا,,اجْعْلْني رَايْمْ الصّْفـــــا
وْنْعْمْ لِي غِيـرْ بْالْــكْفَافْ
انتَ الْعَالْمْ بْالخْفَى,,عجّْلْ باللُّطْفْ والشّْفَـــــا
يَاغُوثْ القُــومْ الضّْعَافْ
الْقْلُوبْ تْعُودْ رَايفَـة,,تْمْـــــلاَ وْدْيَانْ شَاحْفَة
وْيْزُولْ الظّْمَا مْعَ الْجْفَافْ
××××××××××
ثْبّْتْ يَا خَالْقِي عْلَى الْخِيــرْ قْـــدَامِي,,آسيدنا
وْحْسْبْ لِي صَالْحْ الْعْمَالْ
شَايْقْ طِيبَة نْزُورْ وْيْطِيـــبْ مْقَــامِي,,آسيدنا
اونْغْنْـــــمْ كُـــــلّْ مَانْسَالْ
يْرْوَى جْسْمِي مْنْ النّْبْــعْ الزّْمْزَامِي,,آسيدنا
مْيَاهُو صَــــــافِيَة زْلاَلْ
فْجْبْلْ عْرْفَة الشّْرِيفْ يْكْمْلْ اِيْحْرَامِي,,آسيدنا
مَالِيـهْ مْثِيــــــلْ فْالْجْبَالْ

الحربة
صْلِّيوْا عْلَى الْحْبِيبْ مْصْبَاحْ انْيَامِي,,آسيدنا
مُحْمّْدْ خَاتْمْ الرّْسَالْ
ــــــــــــــــــــــــــــــــــــــ
ق4

مْنّْكْ لاْنوَارْ شَارْقَــة,,وْنْســامْ الطِيبْ عَابْقَة
امْدِيحْكْ زَادْنِي اشْوَاقْ
لْمْحْبَّة لِيـكْ سَابْقَــــة,,لْجْــوَارْحْ لِيكْ نَاطْقَة
يَازْهْوْ الْقْلْبْ وْالاحْذَاقْ
دْخِيلْ الدّْعْوَة الصَّادْقَة,,مْنّْك نْشْرْبْ وْنْسْقَى
يُومْ الْمْـحْشْـــرْوْالتّْلاَقْ
×××××××××
فْامْدِيحْكْ رَاحْتِي وْسْقْـــوَة لْعْظَامِي,,آسيدنا
يْشْفِي جْسْمِي مْنْ الْعْلاَلْ
اِسْمْ الْعْبْدْ الضّْعِيفْ بَايْـــنْ فْخْتَامِي,,آسيدنا
تَوْفِيقْ مْطْرّْزْ الْقْوَالْ
كْمّْلْت قْصِيدْتِي وْفْصّْلْـتْ اقْسَـــامِي,,آسيدنا
هَاكْ الحُلَّة عْلَى الْفْصَالْ
سُوّْلْ فْسْلاَ تْصِيبْ عُنْــوَانْ ارْسَامِي,,آسيدنا
عْندْ الرّْحْبَة عْلَى الشّْمَالْ
نْمْدْحْ سيدْ الاْسْيَادْ بْرْقِيـــقْ انْضَامِي,,آسيدنا
حْبِيبْ الله ذَا الجْـــــلاَلْ
وْكْدَاكْ الرَّاشْدِيـــنْ لِيـــــهُمْ سْلاَمِي ,,آسيدنا
وْالْعْشْرَة لاَمْـــةْ الفْضَالْ
مُولاَيَا غِيتْنِي مْنْ الصّـــهْدْ الْحَامِي,, آسيدنا
سْرّْحْ لِي كَامْـــــلْ الْخْبَالْ
××××××××
الحربة
صْلِّيوْا عْلَى الْحْبِيبْ مْصْبَاحْ انْيَامِي,,آسيدنا
مُحْمّْدْ خَاتْمْ الرّْسَالْ

» قصيدة فُوزِيـَّـــــــــة نظم: توفيق أبرام
» سرابة الهاجر نظم: توفيق أبرام
» قصيدة توسل نظم: توفيق أبرام
» قصيدة المسرارة نظم: توفيق أبرام
» قصيدة للشيخ المُتقِن توفيق أبرام