قصيدة اَلجَّـــــــــــارْ
نظم الشيخ محمد لكبير بن عطية
مبيت ثنائي
القسم الأول
اَمَنْ اَهْوَاكْ عذّْبْ قَلْبِي وَفْنَانِـــي
وَفْنَانِي خَلَّى اَمْدَامْعِي طُوفَــــانْ
طُوفَانْ فَوْقْ خَدِّي وَاَلنََّوْمْ اَجْفَانِــي
اَجْفَانِي مَحْبُوبْ خَاطْرِي بَبْيَـــانْ
بَبْيَانْ خَادْ عَقْلِي وَخْرَبْ دِيوَانِــي
دِيوَانِي بِينْ اَلْفْضَا اَبْقَى حَيْـــرَانْ
حَيْرَانْ يَاهْلِي شِي يْعَطَّفْ جِيرَانِـي
جِيرَانِي لَغْدَرْ عَيْبْ لَلجِّيـــــرَان
القسم الثاني
جِيرَانْ مَا تْدُوزْ الْجَـارْ
وَالْجَارْ مَا بْقَى مَهْجُورْ
مَهْجُورْ بِينْ صَهْدْ اَلنَّارْ
وَ اَلنَّارْ كَاتْزِيدْ اَشْرُورْ
اَشْرُورْ مَاطْفَاهْ اَمْطَـارْ
اَمْطَارْ اَوْ مُوجْ اَبْحُورْ
اَبْحُورْ فَايْضَا زَادَتْنِي تَمْحَانِــــي
تَمْحَانِي زَادْ اُزْدَادْ بَالتِّيهَـــــانْ
تِيهَانْ مَالْكِي نَازَلْ لِي فَمْكَانِــــي
اَمْكَانِي تَمْلَى اَبْخِيلْ وَالْفُرْسَـــانْ
فُرْسَانْ مَنْ اَطْغَاتْ اَلْيُوتْ اَلْعَتْقَانِــي
عُتْقَانِي خَلاَّوْ سَاكْنِي وَلْهَــــانْ
وَلْهَانْ يَاهْلِي شِي يْعَطَّفْ جِيرَانِــي
جِيرَانِي لَغْدَرْ عَيْبْ لَلجِّيــــرَانْ
القسم الثالث
جِيرَانْ بَالْحْسَانْ اَتْرُوفْ
اَتْرُوفْ مَاتْدُوزْ اَولِِــيفْ
اَولِِيفْ سَاكْنُ مَدْنُــــوفْ
مَدْنُوفْ وَالْقْلِيبْ اَرْهِيـفْ
اَرْهِيفْ بَالْهْوَى مَخْطُوفْ
مَخْطُوفْ وَالْبْدَانْ اَضْعِيفْ
اَضْعِيفْ يَاتْرَى يَتْبَدَّلْ غِيوَانِــــي
غِيوَانِي يَرْقَى وُحَالْتِي تَزْيَــــانْ
تَزْيَانْ فِي اَقْرِيبْ اِيكًبَّلْ سُلْطَانِـــي
سُلْطَانِي بِيدُو اَنْغَدَّرُ كِيسَــــانْ
كِيسَانْ اَلرّْحِيقْ عْلَى كُلّْ اَلْوَانِـــي
اَلْوَانِــي وَنَا اقْبَالْتُ سَكْـــرَانْ
سَكْرَانْ يَاهْلِي شِي يْعَطَّفْ جِيرَانِـي
جِيرَانِي لَغْدَرْ عَيْبْ لَلجِّيــــرَانْ
القسم الرابع
جِيرَانْ نَاشْطَا بَالـرَّاحْ
بَالرَّاحْ وَالْصْحَابْ اَتْمِيــحْ
اَتْمِيحْ وَاَلشّْمَعْ نُــوَّاحْ
نُوَّاحْ بَاَلدّْمُوعْ اَيْْسِيــــحْ
اَيْسِيحْ وَالْوْتَارْ اَصَـاحْ
اَصَاحْ واَلرّْبَابْ اِيصِيـــحْ
اِيصِيحْ وَالْغْزَالْ اِيْجَاوَبْ لَلْغَانِــي
وَالْغَانِي صُوتُو يْدَهَّبْ لَحْـــزَانْ
لَحْزَانْ يَنْقْلَبْ بَسّْرُورْ وُسَلْــوَانِي
سَلْوَانِي بَوْصَالْ قَدّْ غُصْنْ اَلْبَــانْ
اَلْبَانْ فِي رْيَاضْ اَمْحَتْفَلْ يَرْضَانِـي
يَرْضَانِي وَنْمِيسْ باَلْهْوَى نَشْــوَانْ
نَشْوَانْ يَاهْلِي شِي يْعَطَّفْ جِيرَانِـي
جِيرَانِي لَغْدَرْ عَيْبْ لَلجِّيــــرَانْ
القسم الخامس
جِيرَانْ عَنّْهُمْ اَسْــلاَمْ
اَسْلاَمْ بَالزّْهَرْ مَخْتُـــومْ
مَخْتُومْ طَابَعُ بَنْسَــامْ
بَنْسَامْ طِيبْتُ مَنْسُــــومْ
مَنْسُومْ فَاتَحْ اَلتَّبْسَــامْ
تَبْسَامْ مَنْ اَثْغَرْ مَبْسُـــومْ
مَبْسُومْ اَسْمِي مِيمْ وُحَا كَفَانِــــي
كَفَانِي مِيمْ وَاَلدَّالْ لَتََّبْيَـــــانْ
تَبْيَانْ ضِفْ بْيَانْ اَلزَّوْرْ اَمْعَانِــي
لَمْعَانِي عَنْدِي اَمْفَنّْنَا تَفْنَــــانْ
تَفْنَانْ يَفْتَنْ مَنْ جَحْدُ مِيزَانِــــي
مِيزَانِي زَهَّى اَكْهُولْ وَاَلشَّبَّــانْ
شُبَّانْ وَ الْقْوَافِي مَنْ فَضْلْ اَلْغَانِـي
اَلْغَانِي فَضْلُ اِيعَمّْنَا فَلْئــــانْ
فَلْئانْ وَالْقْبَرْ وَالْبَعْثْ اُلَمْحَانِـــي
لَمْحَانِي حَاشَا اَنْشُوفْهَا بَعْيَــانْ
بَعْيَانْ يَاهْلِي شِي يْعَطَّفْ جِيرَانِـي
جِيرَانِي لَغْدَرْ عَيْبْ لَلجِّيـــرَان
ْ