تــــــراث الملحــــــون
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

تــــــراث الملحــــــون

منتـــــــدى يهتــم بفـــــن الملحــــــــون
 
الرئيسيةالتسجيلأحدث الصوردخول

 

 قصيدة رّْبيعْ فَ الْخْريفْ

اذهب الى الأسفل 
كاتب الموضوعرسالة
Admin
Admin



عدد المساهمات : 739
تاريخ التسجيل : 27/01/2008
العمر : 124

قصيدة رّْبيعْ فَ الْخْريفْ Empty
مُساهمةموضوع: قصيدة رّْبيعْ فَ الْخْريفْ   قصيدة رّْبيعْ فَ الْخْريفْ Icon_minitimeالثلاثاء 16 أكتوبر 2012 - 22:23

قصيدة رّْبيعْ فَ الْخْريفْ

مرمـة:لبسيط المبيت
قياس: غْويتة لدريس بن علي

قالوا الَّلايْمينْ " الْغَرامْ اُجا مْعَ الْهَرَمْ
نَزْوَة وْ صَادْفَتُ فَ:خَّرْ عَمْرُ
وْطَوْحَتْ بهْ عْلاَ كُبْرُ
بْصيرْتُ نَعْماتْ اُبَصْرُ "
وَاللَّهْ اِلى قالوا الْحَقْ وَالْحَقْ عْليهْ نْوَارْ
نَعْماوْا عْلى النَّظْرة لْغيرْها لَبْصيرة وَبْصارْ
مَ كانَنْظَرْفَ: الْكونْ غيرْ هيَّ
هيَّ الشَّمْسْ هيَّ قَمْرة كُلُّ الزِّينْ هِيَّ
هِيَّ نْهايْتْ مْنايا
هيَّ الْقَصْدْ هِيَّ الْغايَة مَنْ عيشْتي فْ:دُنْيايْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْوايا

لوموا وْ كَثّْروافَ: للُّومانْ عْمَلْتْ باشْ نَتْلامْ
للُّومْ كايْجيني ثَناءْ عْطيرْ
أوْ نُسَيْماتْ مْنَ عْبيرْ
حيثْ كَـ نَسْتَحْلاهْ كْثيرْ
مَثْلُ مَثْلْ التَّنْويهْ اَوْ كَـ تَحِيَّتْ يَكْبارْ
وَالدَّهْشَة عَلّْ لَوْجوهْ وَقْتْ مَ نَضْرَتْني لَبْصارْ
وَالنَّظْراتْ الْفاهْيينْ فِيَّ
وَللَّمْزْ وَ الْغْميزْ فْ ساعَتْ لَمْنامْيا عْلِيَّ
وَالـرَّايْدينْ مَـنْـئأيَا
وَجْميعْ مَ لْحَقْني كَالْفَحْمْ دْكَى النَّارْفْ:حْشايْ

أنا السَّالْباني لَهْوَاوِيَّة
بْديتْ نَصْغارْ عْلى كُبْري بْلا هْوايا

أنا نْقولْ هَذي نَسْمَة مَنْ رَوْحْ ياللُّــوَّامْ
هَبَّاتْ عاطْرة فَ: تْواخْرْ لَعْمَرْ
وْصارْ لَخْريفْ اِيزارْ خْضَرْ
مْطَرَّزْ بْ: بَلَعْمانْ حْمَرْ
مَنْ حالَتْ صَمْتْ الْموتْ نَقْلَتْني حُرَّتْ لَبْكارْ
لَرْياضْ الْحُبّْ نْعيشْ فيهْ بينْ عْرايْسْ لَزهارْ
ويلا نَصْدَحْ بَقْصايْدْ شّْجِيَّة
لَطْيارْفْ:لَشْجارْ تْرَدَّدْ حَرْباتْها عْلِيَّ
فَ: رَّصْدْ أَوْفْ: لْـــماية
لَنْغامْ دَالْمْياهْ الْهَمَّارَة كَانّْغامْ لَغْنايْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْوايا

خَلِّيكْ في مْلامَكْ ضَيّْ اُو ديجانْ يا للِّي لاَمْ
وَناخْلاصْ خَلِّيني مَنَّكْ خيرْ
ما يْليَّ فَ: جْوابَكْ خيرْ
طَلَّلْ عْلِيَّ وَجْهْ الْخيرْ
جاتْ الْمَحْبوبة جاتْ غيرْ تَمْثالْ مَنْ الْبَلاََّرْ
جاتْ الزَّبْدة الْمَمْزوجة بَلْعَكَّارْ
حوريَّة مَنْ رَضْوانْ جاتْ لِيَّ
وَالْقاتْني مْغَرَّبْ وَحْداني كي بْكونْ فِيَّ
نَرْفَضْ يالدُّوَّايا؟ نطْرَدْ مَنْ حْياتي ملاكْ؟ مْياتْ لا...وْحَشايْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْواي

رَكابْ مَنْزْلي عَلّْ لَبْطاحْ نوافْدُ فْ: تَرْوامْ
حَيَّاكْ مَنْ مْحَرْبَلْ صوفُ حُرَّ
صْباحْنا وَسْبايَكْ نَقْرَ
وَ فْ: لَمْسا لَوْحاتْ خْرَ
مَنْ لاَ شافْ الأَصيلْ في "سْلا " مَشافْ بْ:لَبْصارْ
فَـنّْ الْفَتْنَة وَ الإِغراءْ وَالدَّهْشة وَ الْيَبْهارْ
مَ زِّينْ كْريمْ يْزَيَّنْ الْعْطِـيَّـة
الْمُبْدعْ جَميلْ الْيَبْدَعاتْ كَوْثْريَّة
وَفْ: كُلّْ ما بْدَعْ آيَة
لاَ حَمْدْ غيرْ ليهْ بْوَحْدُ فَرْضاهْ كاملْ رْضايْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْوايا

في كُلّْ وَقْتْ تاتي وَ فْ: كُلّْ نْهارْ طولْ الاِيَّامْ
فْكُلّْ مَا تْأَتي تَبْهَرْ بَصْري
ابْزينْها وَتْشَتَّتْ فَكْري
وَنْدْهَلْ عَنْ سايَرْ أمْري
ويلا يَغْمَرْها ضَيْ مَنْ الشَّمْسْ اَوَعْدي نَحْتارْ
فَ: الضّْحى..فَ: الزَّوالْ..فَ:الْغُروبْ..آنْواوَرْ وَنْوارْ
شَمْسْ الضُحى فَ: خْدودْها زْهِيَّة
وَلْوانْ الشّْموسْ الدَّهْبيَّة ساطْعة ابْـهِـيَّـة
عَنْ شي جْدايَلْ بْهايا
ديكْ جّْدايَلْ الْجَدَّابَة لَمْلاَمْسي وْمَرْ أَيْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْوايا

لاَ تاجْ غيرْ تاجْ شْعَرْها فَ: عْرابْ اُوفَ: عْجامْ
وَ النّورْ دَ: الْجْبينْ اُو ضَيّْ الْغُرَّة
بَاهْرينْ بْصارْ مْنْ اِيرَى
وْلاَنْطيقْ نْثَبَّتْ نَضْرَة
تَمَّ لَقْواسْ مْعَ نّْبالْ تَـمَّ لَبْحَرْ زَخَّارْ
تَـمَّ لَمَعانْ السّْيوفْ تَـمَّ فيضْ مْنَ اسْرارْ
اُو هَذيكْ السَّهْية السِّحْريَّة
وَشْحالْ كَـ تْحَلَّقْ وَتْطيرْ فْ: كُلّْ جوبِيَّ
وَنا فْ: غَايْتْ مْنايا
نَقْتابَسْ نّْوارْ الْفَضِّيَّة ف: الضّْيا وْفَ: دْجايْ

أنا السَّالْباني لَهْوَاوِيَّة بْديتْ نَصْغارْ عْلى كُبْري بْلا هْوايا

وَخْدودْها عْراصي وَطْوِيَّرْ مَنْ الأَنْفْ حَوَّامْ
وَمْباسَمْ الزّْهَرْ شَرْقاتْ فْ سَرِّي
وْريقْها وَللاَّلي خَمْري
وْكُلْ مَ فيها كَـ: يَغْري
بالْقُبَلْ اُوباضَّمّْ والرّْشيفْ لْشَهْدْ التَّخْمارْ
بالتَّعْناقْ وَلَعْصيرْ وَصّْهيرْفْ: جَحيمْ النّّارْ
وْديكْ تلأَنَّاتْ الصَّاعْدَ آشَجِيَّة
وَنْفاسْها الْحَرََّة تَلْقَحْ مَتْلاحْقة قْويَّة
وَالصَّدْرْ مَرْمْري أية
وَنْهودْ فَيّْـقو فَ:عْماقي طُفولْتي وْصِـبَايْ

كَحَّلْتْ مَنْ امْحاسَنْها عَيْنِيَّة
وَالْبْعادْ قْـرَبــوا ضَهْراتْ لي الْغايَة
وَرْواتْ لي جْناني فَ:الْخَرْفِيَّة
وْغـابْ شيبي فَ: شْبابْ الزِّينْ ياهْنايا
هَذي الْمُعْجِِـزة فَ: الْوَلْفِيَّة
افْ:قَلْبْ شيبي طاحْ اهْواها اعْلا هْوايا
هاكْ ألْبيبْ هدْ الْعَشَّـاقِيَّـة
اوْمَنْ بْدُوها يا حَفَّاظي اِلَى النهـاية
أتاتْني افْ ســاعَة زَما نِِيَّة
اكْـتْـبْـتْـها لَكْ كَما هيَّ بْلا رْوايا
حَجَّبْتْها ابْسورَتْ قولْ أُوحيَّ"
اوْما فْ: سورَتْ قولْ أوحِيَّ مَنْ خْبايا
وَسْلامْ رَبْنا بَنْســومْ دْكِيَّة
اعْلآ هَلْ الذَوْقْ وْ هَلْ لَفْنونْ والدّْرايا
اللِّـــي افْناتْهُمْ الشَّفافِـيَّة
اوْرَهْفَتْهُمْ حَتَّى دابــوا عْلى النْهايَة
وَسْمي اشْهيرْ يامَنْ سَالْ عْلِيَّ
ليـسْ يَخْفاكْ أحْمَدْ سُهومْ فَ:السّْجَايا
مَ زالْ في ابْلادْ السَّلــْوانيَّة
اغْريبْ فَ النَّاسْ وْأُنْسْ احْبيبْتي امْعايا
تمت القصيدة
الرجوع الى أعلى الصفحة اذهب الى الأسفل
https://malhoun.yoo7.com
 
قصيدة رّْبيعْ فَ الْخْريفْ
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
تــــــراث الملحــــــون :: منتدبـــــات الملحــــون :: قصائـــــــــد مقـــــروءة-
انتقل الى: