قصيدة الكناوي نظم التهامي لمدغري

نظم الشيخ التهامي المدغري

مبيت ثلاثي
الحربة

ألايم حالي محاوري عنك ما يخفاو , خدي في حاله و خد من هواها راوي
وجنتها ناري و خالها مولاتي زهوه
القسم الأول
معظم داك اليوم فاش صدو ناسي و مشاو ,تركوني نواح في الرسام الضميري
كاوي , يحسن عاون اللي امشاو ناسو من بعد كواو
صدو عن قلبي ارحيلهم و مع انجم اسراو , و ارجعلي افراقهم في اعضايا متاوي
و تمادا طولو في ساكني و حلف ما يضوى
لو حملو داتي مع اضمير امناير ضواو , بهوى دا ازكدي ابريزها بالحجر ضاوي
لو حملو جسمي مع العقل تكمل النشوة
آلايم فرقو القلب عني و حدو و غداو , تركوني نجري مع اسراب فكل اسهاوي
لو ماهو حسو انواقس انتيه مع السهوى
بجناجل و مقايس الذهب بنغمات ادواو , و امداور و اطرارش شلحلي للخد مخاوي
و سوالف حبراج ريشهم على القلب هوى
القسم2
معظم هولي في يوم اصدو ,خلاوني على الحس انتبع الحادي
و المرحول يزين رعدو , بين اللقاح نحكي صيغت تنهادي
و الغزلان الى يشردو , متل الريام ديك الهادي فوهادي
صابوني فوهام حيهم متوله و لغاو , قالو أش تكون ؟ قلت عبد وصيف كناوي
مشرط الحناك مايلي بعد الحي دوا
نظرو في حالي تمكنو في و تمعناو شافو عن خدي خطوط و هاد الدمع الهاوي
و ورقتي كحلة داوني مكسوب لزهوه
و وليت نصلح الرماد و انحملو وين اكداو , نحطب و نسقي الكرب و نوني و نساوي
و تدق و تاد الخيام محزوم بلا رخوى
و نوقف عمدان الخوالف الى ارتخاو , شرطان الخيمة نشدهم في شغلي قاوي
و نحلب نياق البهى نسقيهم برغوى
و نركب الأطفال فوق من زندي كان بكاو , و نراري بيهم حالت الملسوع الهاوي
قالو هاد العبد ناصح ارخيص ما يسوى

القسم 3
يخدم في الحلات و حدو , ما كلمها اعيا في شغلو جدادي
عبدو خادم ما توجدو , غير الدي عليها جاد الجوادي
ماخلى شي فوق جهدو , يظل و يمسى طاير جاي و غادي
لينا كمو صيف ليسطاقو مثلو يشقاو, أراو نرفقو بحالتو ايكفاه ايلاوي
لو حملو تقلو قعود يتحمل ما يقوى
و قاموني بيناتهم في اتمن استغلاو , دربو بالقرعه العود و رجع عودي داوي
خفت ايجي في غير من اهويت تعظم الدعوى
ارماو العيدان بعد ما ارتجاو و سماو, جا عودي في غيرها و حلت بيه ادعاوي
طحت أنا مصروع مالي عن حالي قوة
بهتو في حالي ملي شافو وعدي و رغاو, أرغيت و ارتغيت سالت من الفم رغاوي
قالو دابيه الرياح دون غراد و انطوى
اجتمعو عن حالي و اتعجبو ظلمو و تعداو , بالعود الموسوم مادراو باش أنا ناوي
ياحصرى معتى محايني من بعد السلوى
القسم4
رفعني سيدي لعندو , و القلب عند غيرو و لاحد يفادي
جاب الكزانات و جدو , كدبو عليه شمتوه داوه أوعادي
قالو هاد العبد و عدو , دغيا قريب يتصرف دون مادي
يسحابو مسكين واش بالحق عليه دواو , جاب بخور الند والقماري جاب اجاوي
طلعو ليه املوكهوم انطقو ليه بلخوى
قالو ادبح اعليه لا غناه اضرارو يبراو , جيبو ليه بربري في الفراسة و اللاوي
ينظر في المدره البايته في اسمرة غدوة
أو يشوف الكتف كيف قالو فبه و انهاو , و لا شي خطاط أو حبر انجيم اسماوي
أو احكيم انجيم حافظ الطب بلا دعوى
جاو اجميع اعارفين أوعدي ليس ادراو , و لاباقي غير ناس تعرف عزي الهاوي
فجداول اتخميس فايزبن في سيتو نجوى
جامنهم حكيم غاتني من بعد ما شتفاو , في رقباني و فادني بالخط الساوي
ظهرت اسراو اعجوب بالآسم و الكنوة
سمعت بيه الباهيا و ناس الحسن و جاو , اتبسمت و فاح طيبها عني مسكاوي
شميتو من ريحتو جعلني ربي فجوى

القسم5
الفقيه و لا ليه الغندو , انسى قرايتو و رجع لي بوجادي
سحرتو من بعد رشدو , بالخد و الجواهر و عيون اهنادي
راح امريض فديق نكدو, مافادلو سحر لا حولا في هادي
اتفكرت الريم ماخدمت و قالت انتهاو , هاد العبد انتاع والدي مملوك حراوي
ملكي بالشهودي اصحيح ماطيحتو الرشوة
شهودي شعري و حاجبي و ليهم اضواو , خدي و اجبيني وغرتي و الهدب اشراوي
ثغري و شفايفي و ريق اعصير الحلوى
جيدي و ادرعين و انهود انباو و ستواو , اعكونو و السرة مخوصرة و البطن الطويل
و اردف المالي و ساق فوق اقدام الخطوة
تبت رسوم الباهيا و سقوط ارسوم من ادعاو, اتبت قاول اشهودها و قول الداعي خاوي’
ما نفعو تبيان في حكامو من بعد الدعوى
و دعات العراد ناسها للقاضي و مشاو , و كلات غزالي و كيلها فاهم قاضوي
حازني بمواجب الشرع و صحيح الفتوى

القسم6
ظفر القلب بطيب قصدو , و كمل بالرضى من ولفي مرادي
و اضفى جمري من بعد وقدو , و غنمت بالوصال الرايق تمرادي
زهيت بخدو و ودو , فبساطنا شريق و شمعو وقادي
تركت الواشي في نكدو , و كذالك الرقيب و لامت حسادي
واسقاني و اسقى من ايدو , حتى ارويت و اروى من خمر أوكادي
طحت و طاح من فوق زندو , بتنى معانقين و دراعو لوسادي
لاح الصبح على مكندو , نلقى اجبين و لفي من قبل أو كادي
زاد اشعاع دياه زندو , زدنا الليل لليل من غير عدادي
و الألي بطبوع نشدو , بين لشجار يلغيو و ارباب ينادي
فتح فوسط الروض خدو , غنى الطير و العود انغام بنشادي
و الخيلي خيلو يوكدو , المديلكا و سوسان و زهر وسادي
و جميع الحساد ركدو , غير اشقيق و نرجس صبح نادي
سكلماسي فاح ندو , نسرين و ساسمين و عاشق لتمادي
جلينار صغير نهدو , سالو عليه من زادت هول فسادي
وراتولي بنت العدو , في جدار دارها و دموعي هوادي
قد الكمشه هاداك جهدو , رمان مار قلبي نسيت أورادي
شهدو يا الريام شهدو , أنا غلام ولفي مصباح تمادي