قْصِيدَة السَّاقِي

قْصِيدَة السَّاقِي

نظم الشيخ الجيلالي امتيرد

مبيت ثنائي



القسم الأول


الايَمْ مَاهَزَّكْ حَـــــالْ مَـــــــــا عْلِيكْ ابْكُلْفَا قَلْبَكْ مُهَجْتُ هَنََّاهَـــــــــــا

مَنْ ابْهَا زِينَاتْ التَّخْلِيـــــلْ

مَا شْفِيتِي مَانَكْوِيتِي وَلاانْضَرْتِهُمْ فِي حَضْرَ اعْلَى اتْفَاقْ ارْضَاهَــــا

دِيكْ عَنْ دِي بَالْوَجْدْ اتْمِيلْ

صَايْلا بَمْحَاسَنْ وَجْمَالْ كَاكْوَاكَبْ فَسْمَا صَافِي ابْنُورْ حُسْنْ اضْيَاهَا

مَالْهَا عَلْ لَوْصَافْ امْتِيــلْ

طَلْقَتْ ادْوَايَبْهَا وَهْوَاتْ كَاتْعَابَنْ وَنْقِيشْ عْلَى اخْدُودْهَا وَتَـــــــــــاهَا

وَالشّْفَرْ عَلْ لَوْرُودْ ادْبِيــلْ

مَنْ ابْهَاهُمْ رَوَّحْتْ اجْرَاحْ لِيلْتَنَا كَانَتْ مَاتَقْوَى لْمَنْ اقْوَى يَلْقَاهَــــــا

بْصُولَتْ الْهِيبَا وَ التَّكْلِيـــلْ

دُوّْرُ بَالصَّفْرَا كِيسَانْ كُلّْ وَحْدَا لاَحَتْ بَشْوَاقْهَا الحَافْ اغْطَاهَـــــــا

جَرّْدُ غُزْلانَاتْ الْبِيـــــــــلْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــا

كُبّْ يَا سَـــــــاقِي رَاحْ الِّيـــلْ



القسم الثاني

السَّاقِي مَالَكْ وَلْهَــــــانْ عِدْ لِي لاتَكْتمْ سُـــــولانْ مَالْ حَالَكْ مَــالُ

قَالْ لِّي مَكََْوَانِي حَيْرَانْ خَاطْرِ وَ السَّاكَنْ دَهْشَانْ مَنْ ابْهَا قَتَّـــــالُ

المْدَامْ وُحُسْنْ الْحَسَــانْ وَالنّْضَرْ فَالزِّينْ الفَتَّـــانْ وَالْهْوَى وَاهْوَالُ




كِيفْ مَا بِينْ الْمَا وَالنَّارْ اوْمَنْ دَارَتْ بِهْ اعْدَاهْ كَاتطَّلْبْ افْدَاهَـــــــــا

بْجُنْدْ رَامِي وَكَْصَاصْ الْخِيلْ

تَنْتْقَلْ بَطْرَارَدْ وَعْلُومْ عَلْ الْحَرْبْ اتْشَالِي بَقْلُوبْ كَنّْ صَلْدْ اصْفَاهَا

كُلّْهَا جَرَّدْ سِيفْ اصْقِيلْ

بَالزّْعَمَا وَ القُومْ ابْطَالْ كَنّْ وِيدَانْ احْكِيتْ الَى اتْجِي بْحَمْلَتْ اطْمَاهَا

فِي ازْمَانْ الرَّعْدَا وَ السِّيلْ

َوالْفْرِيدْ النَّايَحْ رَغَّابْ مَنْ الْمُولَى يَطْلَبْ لَنَّفْسْ يَاعْدُولْ انْجَــــــــــــاهَا

اشْنُ مَنْ لالِهْ اكْبِيلْ

هَكْدَاكْ أَنَا يَاسِيديِ بْشُوقْ لَرْيَامْ الْمَشْتَمْرَا عْلَى اسْفِيكْ ادْمَـــــــــــــاهَا

بَالطّْعَنْ وَ الْقَنْصْ وْ الْقْتِيلْ

كَارْمَا تَتْخَتَّلْ للصِّيدْ زِينْ وَبْهَا وَ السَّرْ افْحَالَتْ السّْرُورْ اكْسَـــــــــاهَا

وَالْحْرُوفْ اصْوَارَمْ وَتْقِيلْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــا

كُبّْ يَا سَـــــــاقِي رَاحْ الِّيـــلْ



القسم الثالث


جَاوَبْ السَّاقِي بَعْدْ ادْوِيتْ قَالْ لِّي نَصْبَرْ مَــــاكًدِّيتْ يَاهْمُومْ اشْكًايَـا

وِينْ مَـــــاصَدِّيتْ وُشَبِّيتْ انْظَرْ بَابْ الْمُوتْ اعْيِيتْ بَاحْ سَرّْ اهْوَايَا

وَالنّْوَاجَل ْمَنّْهَـــــا نَكْوِيتْ لامَنْ انْشَفُو كَـــانْ ابْكِيتْ لَلْكْرِيمْ اشْكَايَــا




كِيفْ نَصْبَرْ مَنْ غِيرْ اصْبَرْ وَ النّْوَاجَلْ عَطْفَتْ بَقْوَاسْهَا لْمَنْ وَلاهَــــــــا

فُوقْ وَجْنَاتْ اعْلَى التَّكْلِيلْ

لُوكْشَفْ قَلْبِي لِكْ اغْطَاهْ مَاتْطِِّيقْ اتْخَقَّقِ كِيَّاتْ لِعْتُ مَعْتَاهَــــــــــــــــــــا

مَاْشَكا دُونْ اسْبَابْ اعْلِيلْ

كُلّْ مَجْرُوحْ ايْصِيبْ ادْوَاهْ وَاّْلدِي مَنّْهُمْ اجْرَاحْ ايْعَزّْ طَبّْ ادْوَاهَــــــــــا

لُو اضْحَى بِهْ الْعَمْرْ اطْوِيلْ

لُو احْضَرْتْ مْعَ عَرْبْ اهْلالْ مَانْرَوَّحْ هَادْ الشِّي مَنْ اجْرَاحْ يَامَكَْوَاهَا

حَرّْ مَن حَرّْ اشْبُوبْ انْيلْ

اشْ نَطْفِي وَاشْ انْبَرَّدْ عِدْلِي مَنْ شَعْلَتْ نَارُ مَنْ النّْسَا وَطْفَاهَــــــــــــا

مَالْهَا عَلْ لَعْضَا تَحْوِيلْ

حُرْمْتَكْ سَاِقِيكْ ارْفَق ْبِهْ فَاتْ قَيْسْ الْفَايَتْ هَوْلُ اغْرَايْبُ عَدَّاهَـــــــــــا

مَايْضَاهِي لُ حَدّْ اخْلِيلْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــا

كُبّْ يَا سَـــــــاقِي رَاحْ الِّيـــلْ



القسم الرابع


ُقلْتْ يَا سَاقِي شَدّْ احْــــــزَامْ لاتْعَاتَبْ نَفْسَكْ بَمْــــــــلامْ خُدْ لِكْ ايفَــادَا

فْعَلْ مَاَفَعْلُ هَلْ لَغْـــــــــرَامْ حِينْ تَعْطَفْ عَنْهَا لِيَّــــــامْ فَرْحْهُمْ يَتْزَادَا

أشْ مَنْ حَضْرَا دُونْ ارْيَامْ وَاشْ مَنْ صَفْرَا دُونْ امْدَامْ لَلْقْلُوبْ الْـدَادَا




مَتَّعْ ابْصَارَكْ وَاتْزَهَّى وُشُفْ لَحْبَابْ فْمَا يَهْوَى الْقَلْبْ وُيَشْتْهَـــــــــاهَا

فَالنّْعَايَمْ وَالشَّمْعْ اشْعِيلْ

اشْ بَاقِي لِكْ مَنْ تَنْكَالْ لِيلَتْ الْفَرْجَا مَعْلُومَا ابْفَرْحْهَا وَتْنَــــــــــــــاهَا

مَايْحَضْرْ امْعَهَا تَهْوِيلْ

البْنَاتْ اغْنَايَمْ وَسْرُورْ كِيفْ يَسْهَى عَقْلَكْ وَتْتِيهْ عَنْ احْضَرْتْ احْمَاهَا

مَاكْرَهْ مَصْرِ فِيضْ النِّيلْ

قَلْبْ مَنْ كَانْ اهْمِيمْ اشْغِيبْ كَانْ شَاهَدْمَنْ يَنْسَى لِيعْتْ الْقْضَى وَلْضَاهَا

وْ مَا فْسَاعْتْ الْهْنَا تَبْدِيلْ

فَاتْ قُولْ اصْحِيحْ اسْمَعْنَاهْ لاتْبَدَّلْ سَاعَت لَهْنَا ابْتَعْبهْاَ وَشْقَاهَــــــــــا

وَمَا تْكُونْ اعْلَى الْوَجْدْ ابْخِيلْ

كِيفْ يَحْضَرْ عَقْلَكْ وَيْغِيبْ وَ الْعْوَارَمْ قُدَّامَكْ كُلّْهَا ابْمَا يَعْنَاهَــــــــا

هِبْ نَفْسَكْ للطُّوعْ اتْمِيلِْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــا

كُبّْ يَا سَـــــــاقِي رَاحْ الِّيـــلْ



القسم الخامس


مَاخْطِيتِي حَــــــاشَا وَ اللهْ غِيرْ خَاطَبْتِي مَنْ تَهْوَاهْ زَادْ بِكْ اوْلاعَـــــا

والزّْهُو مَسْطُورْ انْضَمْنَاهْ وَالْهْوَى سَاقِي سَمِّنَـــــاهْ وَالْوْدَنْ سَمَّاعَـــــا

زِدْ غَدَّرْ كَاسَكْ وَلْقَـــــــاهْ لِيلْنَا بَالْفَرْحْ اغْنَمْنَــــــاهْ جَلّْ طِيبْ اخْلاعَا




هَيَّجْ السَّاقِي دَكْرْ اغْنَاهْ رَادَفْ اعْرَاقِي فَعْرَاقِي وُلِيلْتُ حَيَّاهَا

صَارْ يَسْقِي رَفْقْ وُ تَمْهِيلْ

شَاعْ لَخْمَرْ هَيَّجْ الْبْنَاتْ بَاحْ وَفْشَا مَكْنُونْ اسْرَارْهَا وُطَارْ احْيَاهَا

لاحْ طِيرْ الْحُسْنْ الكُبِّيلْ

دِيكْ بَكَْرَايَحْهَا تَنْشَدْ دِيكْ بَقْصَايَدْهَا تَلْفَضْ وُ الخْرَى بَغْنَاهَا كَانْغَمْتْ الْمَيَا وَ الدَّيْلْ

تَاكْ لَفْجَرْ وَالِّيلِْ انْشَالْ وَ الْطْيَارْاتْسَبَّحْ بَصْوَاتْهَا الْمَنْ انْشَاهَا

وَالْغْصَانْ اكْسَاهَا اتَخْبِيلْ

هَبّْ مَنْ جُوّْ الْفَلْكْ انْسِيمْ بَعْدْ صُولَتْ لَمْكََامْ الْبِينْ للْوْدَاعْ ادْعَاهَا

كَايْنَادِ بَالْعَزْمْ ارْحِيلْ

كُلّْهَا وَدَّعْ مَنْ يَهْوَاهْ لِهْ قَالُ لِيلَتْنَا يَالشَّيْخْ لاتَنْسَاهَا

زِدْنَا فَوْصَافَكْ تَبْجِيلْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــا

كُبّْ يَا سَـــــــاقِي رَاحْ الِّيـــلْ



القسم السادس


خُدْ لَكْ سَاقِي يَامَنْ رَادْ مَنْ ابْدِيعْ اجْوَاهَرْ لَنْشَــادْ مَاخْفَا نَشَّـــــادُ

عَبْدْ الْجَلِيلْ اتْبَرْ لَنْشَـادْ فِي مْدِينْ الْحَمْرَا يُعَـــــادْ بِينْ دُوكْ وُهَادُ

يُومْ تَدْفَعْ لَلْحَرْبْ اعْكَادْ وَالّْفَاضْ عْلَى الْحْكْمْ اشْهَادْ وَيْهْزَمْ جَحَّـــادُ




وَالْشْيَاخْ ابْلَصْنَافْ ادْرَاجْ بَعْضْ عَنْ بَعْضْ وُمُولْ الْمُلْكْ كِيفْ رَادْ اسْقَاهَا

قَالَتْ ارْبَابْ اهْلْ التَّاوِيلْ

الْعْقَلْ نُورْ امْنْ التَّنْوِيرْ وُيْسْعْدْ مَنْ فَازْ ابْدِينُ افْرَايْضُ وَدَّاهَــــــــــــــــــا

دَاكْ رَبْحُ وَ الْفَضْلْ احْصِيلْ

مَنْ السَّهْوَى يَقَّضْ جَفْنَكْ يَا الطَّافَحْ رَدّْ اعْلَى الْعِيبْ كَلْخْتَكْ لَجْوَاهَـــــــا

يَامَنْ اغْشَى دَهْنُ تَخْبِيلْ

مَادْعِيتْ ابْدَعْوَى مَفْهُومْ سَاقَطْ الدَّعْوَى وَ النَّفْخَا ابْنَاسْهَا شُوَّاهَـــــــــــا

فَدّْ رَاقِي وَ الْعَقْلْ اعْقِيلْ

رَبّْنَا عَلْ لَعْبَادْ ايْتُوبْ وِيرْحَمْنَا بَرْحَمْتُ وِيمْحِي اوِْزَارْ اخْطَاَهــــــــــا

حَيّْ سَامَعْ بَالْفَضْلْ اجْزِيلْ

وَالسّْلامْ الاَمْتْ لَشْرَافْ وَالْشْيَاخْ وْطَلْبَا وَعْلَى اهْلَ التّْنَا وَ ْنَباهَــــــــــا

عَدّْ مَا حَفْلَتْ بِهْ احْفِيلْ

السَّاقِي وَكَّضْ لَرْيَامْ رَدّْ بَالَكْ لَلنُّوبَا لاتْغِيبْ عَنْ مُـــــــولاهَــــــــــــا

كُبّْ يَا سَـــــــاقِي رَاحْ الِّيـــلْ


انتهت القصيدة