Admin Admin
عدد المساهمات : 739 تاريخ التسجيل : 27/01/2008 العمر : 124
| موضوع: قصيدة قُوتْ الرُّوحْ السبت 22 سبتمبر 2012 - 16:46 | |
| قصيدة قُوتْ الرُّوحْ
نظم الشيخ الجيلالي امتيرد مبيت ثلاثي
القسم الأول
اَهْ عْلَى مَنْ اَكْوَ وُ قَلْبُ مَجْرُوحْ كْمَا كْوِيتْ وُكَايَدْتْ اَجْرَاحِــــي وَمَا قَسيتْ فَلْمْحَبَّا وَسْرَارِي بَاحُ طُولْ اَدْجَيَا نْبَاتْ نَرْتِي وَانُّوحْ طَالْ هَجْرِي وَلْزَمْتْ اَنْوَاحِــــي وَدْمُوعِي بَلْشْوَاقْ مَنْ فُوقْ اَخْدُودِي طَاحُ وَلِّي نَهْوَى اَحْلَفْ لاَ عَتْقْ الرُّوحْ وُلاَ عْطَفْ وُ لاَ اطْلَقْ اسْرَاحِي وَغْلَقْ بَابْ الرّْضَى عْلِيَّ وَدَّا مَفْتَاحُ خَلاَّنِي دُونْ حَالْ بَالسَّرّْ انْبُوحْ زَنْدْ جَمْرِي وَقْوَى تَلْحَاحِــــــي يَحْسَنْ عَوْنِي مْنَ الْهْوَى صَدْفْ الْقَلْبْ اجْرَاحُ شَرْعْ الْمُولَى مْعَاكْ يَا قُوتْ الرُّوحْ اَكْمَالْ اسْرُورِي وَ افْرَاحِــــــي وَافِينِي بَلْوْصَالْ يَاكْ اخْلاَكًِي يَرْتَاحُ
القسم الثاني
مَبْكًانِي بَلْهْوَى امْجَيَّــحْ وَالْعَاشَقْ كِيفْ مَا يْجِيحْ بَايَتْ طُولْ الدّْجَا اَلنُّوَّحْ سَاهَرْ وَمْدَامْعِي اتْسِيحْ وَقْلِيبِي بَالجّْفَا امْجَــرَّحْ مَنْ فَكُْدْ الزِّينْ مَانْرِيـحْ وَبْقِيتْ اغْرِيبْ كَاوِي بَجْمَــــــارْ مَنْ الْغُرْبَا فَرْقَتْ لَــحْبِيبْ مَا كِيفْ افْرَاقْ الزِّينْ صَعْبَا كَاوِي بَصْلِيبْ مَنْ فُوقْ اجْبِينِي نَارْ الْمْحبَّا يَحْسَنْ عَوْنِي افْرِيدْ هَايَمْ مَجْيُوحْ مْنَ لَفْرَاقْ اتْقَوَّى تَجْرَاحِــــي وَجْرَا لِي مَا اجْرَى الْقِيسْ فْهَوْلُ وَجْيَاحُ عَمْدَا لَلِّي عْشِيقْ كِفِي مَكًْرُوحْ بَلْهْوَ قَلْبُ مَاهُ سَاحِــــــــــــــي كِيفْ افْنَانِي وُ مَلْكْنِي وَطْعَنِّي بَرْمَاحُ وَلِي نَهْوَى اسْلِيمْ سَالِي مَشْرُوحْ وُ لاَ عْلِيهْ افْعَشْقِي يَا صَاحِــي مَا نَكْوَى مَنْ الْحُبّْ كِيفِي نَكْوِيتْ مْنْ الْمَاحُ خَلاَّنِي بَلْغْرَامْ مَثْلْ الْمَرْيُوحْ هَاجْ وَجْدِي وَعْظَمْتْ ارْيَاحِـي وَعْصَفْ رِيحْ الْهْوَى عْلِيَّ وَعْظَمْتْ ارْيَاحُ شَرْعْ الْمُولَى مْعَاكْ يَا قُوتْ الرُّوحْ اَكْمَالْ اسْرُورِي وَ افْرَاحِــــــي وَافِينِي بَلْوْصَالْ يَاكْ اخْلاَكًِي يَرْتَاحُ
القسم الثالث
الْـــحُبّْ ابْلِيّْتُ اصْعِيبَـــــا عَمْدَا لَلْعَاشَقْ لــــــَغْرِيبْ مَا كِيفْ امْصِيبْتُ امْصِيبَا مَبْكًاهْ اَمْنْ الْهْوَى اشْغِيبْ نِيــــــرَانُ وَاقْدَا الْهِيبَـــــا مَا كِيفْ اجْمَارْهَا الْــهِيبْ لَفْرَاقْ اصْعِيـبْ قُلُ لَلْمَالَكْ مَنْ اجْفَــــانِي يَعْجَلْ فَقْـــرِيبْ بَلْوْصَالْ قَبْلْ انْعُودْ فَانِي فَاكًدْ لَـــــحْبِيبْ ضَدّْ فْعَدْيَانِي وُ رُرقْبَانِي وَعْلَى جَمْرْ الّْظَا اقْلِيبِبِي مَطْفُوحْ كِيفْ نَهْنَا وتْرِيحْ اكْلاَحِـــــــي عَمْدَ اللِّي اعْشِيقْ مَا بَرْدَتْ نَارْ اكْلاَحُ مَا يَهْنَى مَا يْرِيحْ قَلْبُ مَتْيُوحْ كْمَا فْنِيتْ وُ تَهْتْ مَنْ اسْيَاحِي عَمْدَ اللِّي كْوَاهْ كِيفِي وسْكَنْ فَشْبَاحُ عَنِّي خِيلْ الْغْرَامْ تَغْدَا وَتْرُوحْ كْمَا لْعَبْتْ اخْيُولْ فَمْرَاحِـــــي مَيْسُورْ الدََّاوْنِي الَّبْهَا وَسْرَارِي بَاحُ وُ لِهَا قُلْتْ فِي امْهَاجِي مَدُّوحْ بِكْ نَلْهَجْ فَغْدَا وَرْوَاحِـــــــــي زِينَكْ مَكْمُولْ يَالْعَذْرَا يَعْجَزْ مَدَّاحُ شَرْعْ الْمُولَى مْعَاكْ يَا قُوتْ الرُّوحْ اَكْمَالْ اسْرُورِي وَ افْرَاحِـــــي وَافِينِي بَلْوْصَالْ يَاكْ اخْلاَكًِي يَرْتَاحُ
القسم الرابع
اَفَارَكَْنِي عْلَى اوْلاَفِي شَرْعْ الْمُولَى مْعَــاكْ رُفْ لَجْوَادْ ابْجُودْهَا تْكَافِي بَلْجُودْ اُغَايَتْ الْعْطُــــوفْ وَافِينِي بَلْوْصَالْ وَافِي وَعْطَفْ يَاصَابَغْ الْحْرُوفْ عَشْقِي فَالزِّينْ مَنْ صُغْرٍي كَاوِي بَلْمْحَاسَنْ لاَكِنْ الْـــــبِينْ جَرَّحْ قَلْبِي سِيفُ الطَّــــاعَنْ وَبْقِيتْ اوْهِينْ مَنْ لَهْوَ مَاكِيفُ امْحَـــــــايَنْ وَنَا حَالِي انْحِيلْ وَالْعَشْقْ اجْمُوحْ وَالْغْرَامْ اسْكَنْ مِيرْ اشْبَاحِي مَنْ صُغْري يَاهْلَ الْهْوَى مَتْقَلَّدْ بَسْلاَحُ أَهْ امْنَايَنْ غَابْ ضِيَّ الدَّبْدُوحْ صَدّْ عَنِّي وَجْفَا مُرْكَاحِي خَلاَّنْي كِيفْ طِيرْ مَتْقَزَّبْ رِيشْ اجْنَاحُ انْصَرَّفْ مَاقْضَاالسَّابَقْ فَلُّوحْ كِيفْ رَادْ الْحِيّْ الْفَتَّاحِي نَطْلَبْ مَنْ لاَيْنَامْ يَجْبَرْ حَالِي بَصْلاَحُ نَرْجَا الْمُولَى ايْعُودْ حَالِي مَصْلُوحْ بَلْهْدَا نَتْبَعْ نَهْجْ اصْلاَحِي نَسْعَاهْ ابْلَنْبْيَا مْعَ لَوْلِيَّا صَلاَّحُ شَرْعْ الْمُولَى مْعَاكْ يَا قُوتْ الرُّوحْ اَكْمَالْ اسْرُورِي وَ افْرَاحِـــــي وَافِينِي بَلْوْصَالْ يَاكْ اخْلاَكًِي يَرْتَاحُ
القسم الخامس
نَطْلَبْ مَنْ لاَيْنَامْ يَعْـــــفُ مَنْ لِهْ الاَمْرْ وَالْحْكَـــــامْ يَحْعَلْ لِي فِي اقْضَاه لُطفُْ يَنْقَدْ حَالِي مَنْ الْهْيَـــــــامْ اللََّهْوْ سْوَايْعُ يْصَـــــــرْفُ نَظْفَر اَ بْغَايَتْ الْمْرَامْ نَرْجَعْ لَلْخِيرْ اُمَنْ لَمْزَاحْ انْدِيرْ خَيْـــرَا مُولْ التَّدْبِيرْ يَعْفُ عْلَ لْخْلاَكَْ العْسِيرْا بَعْدْ التَّعْسِيرْ يَرْحَمْنِي وِيفْتَّحْ الْبْصِيرَا خُدْاحَفَّاضْ خُدْ قَوْلِي مَمْدُوحْ مَاسَكْ امْعَانِي فِي تَوْضَاحِــي لَهْلْ الْمَعْنَا الرَّايْقَ بَالَّفْضْ اتَوضَاحُ وَسْلاَمْ اللَّهْ قَدْ مَّارَاتْ الرُّوحْ لَلْشْرَافْ وُطَلْبَا لَفْصَاحِـــــي وَعْلَى جَمْعْ الْشْيَاخْ مَافَاحْ الزَّهْرْ الْقَاحُ الجَّاحَدْ يُومْ الْوْغَا بْشَعْري مَفْضُوحْ لاَغْنَا يَصْدَفْ سَنّْ ارْمَاحِــي مَازَالْ الَى انْهَمْتْ خِيلِي تَلْعَبْ فَمْرَاحُ وَالاسَمْ مَاخْفَا مْبَيَّنْ مُوضُوحْ كَاهْلاَلْ اشْرَقْ لِيلَتْ وَاحِــي عَبْدْ الْجْلِيلْ مَنْ اتْسَالْ قَالْ فْمَعْنَاتْ اوْشَاحُ نَطْلَبْ رَبِّي يْعُودْ دَنْبِي مَسْمُوحْ وِيخْتَمْ عَنِّي وَقْتْ ارْوَاحِـــي ابْحُسْنْ اَلْخَتْمَا يْجُودْ لِي مَنْ فَضْلُ وَسْمَاحُ شَرْعْ الْمُولَى مْعَاكْ يَا قُوتْ الرُّوحْ اَكْمَالْ اسْرُورِي وَ افْرَاحِـــــي وَافِينِي بَلْوْصَالْ يَاكْ اخْلاَكًِي يَرْتَاحُ
تمت القصيدة | |
|